İtaliyada “memarlığın atası” sayılan Vitruvius tərəfindən dizayn edilmiş 2000 illik bazilika aşkarlanıb
Bakı, 21 yanvar, AZƏRTAC
İtaliyalı arxeoloqlar qədim mətnlərdə təsvir edilən və “memarlığın atası” adlandırılan Roma memarı Markus Vitruvius Pollio tərəfindən layihələndirilmiş bazilikanın qalıqlarını aşkar ediblər. Onlar bildiriblər ki, bu tikili 2000 il əvvələ aiddir.
AZƏRTAC ANSA agentliyinə istinadla xəbər verir ki, İtaliyanın mədəniyyət naziri Alessandro Giuli mətbuat konfransında bildirib: “Bu, sensasiyalı bir tapıntıdır, gələcək nəsillər üçün də mühüm bir irs nümunəsinin aşkar edilməsidir”.
Arxeoloqlar bu bazilikanı Romanın şimal-şərqində yerləşən Fano şəhərində tapıblar. “Mənə elə gəlir ki, bu, əsrin kəşfidir, çünki alimlər və tədqiqatçılar 500 ildən çoxdur ki, bu bazilikanı axtarırlar”, - deyə şəhər meri Luka Serfilippi bildirib.
Regional arxeoloji müfəttiş Andrea Pessina jurnalistlərə bildirib ki, kəşf edilənlərlə Vitruviusun kitablarında olan təsvirlər arasında mütləq bir uyğunluq var. O qeyd edib ki, bazilikanın düzbucaqlı düzülüşü olub, uzun tərəfində 10 sütun, qısa tərəfində isə dörd sütun yerləşib.
Qazıntı zamanı dörd sütunun qalıqları ortaya çıxdıqda, arxeoloqlar yuxarı sağ künc sütununun harada olacağını hesablamaq üçün Vitruviusun təsvirlərindən istifadə ediblər. Pessina əlavə edib ki, qazıntılar bazilikanın daha çox hissəsinin yeraltında olub-olmadığını və ərazinin ictimaiyyətə göstərilib-göstərilməyəcəyini müəyyən edəcək.
Bölmənin digər xəbərləri
