İtaliyada Qafqaz Albaniyası haqqında kitab nəşr olunub
Bakı, 3 oktyabr, AZƏRTAC
İtaliyada “Qafqaz Albaniyası itmiş çarlıq. Azərbaycanda və Şərqi Qafqazda tədqiqatlar və kəşflər” kitabı nəşr edilib.
AZƏRTAC xəbər verir ki, 2017-2021-ci illərdə İtaliyanın ölkəmizdə səfiri olmuş Auqusto Massari tərəfindən qələmə alınmış kitabda Qafqaz Albaniyası dövləti haqqında ətraflı məlumat verilir. İtalyan dilində yazılmış kitab 466 səhifə və 68 illüstrativ fotodan ibarətdir. Kitabın yazılmasında əsas məqsəd Qafqaz Albaniyası dövlətinin tarixi, arxeologiyası, memarlığı və s. haqda məlumatların İtaliya və Avropanın digər ölkələrinin oxucu kütləsinə çatdırılmasıdır. Giriş və 13 fəsildən ibarət olan kitabda Qafqaz Albaniyası ilə Roma imperiyası arasındakı əlaqələrdən tutmuş ermənilərin Qarabağda törətdikləri vandalizm aktlarına dair faktlar öz əksini tapıb. Kitabın ərsəyə gəlməsində AMEA-nın Arxeologiya və Antropologiya İnstitutunun Antik dövr və Alban arxeologiyası şöbəsinin müdiri tarix üzrə fəlsəfə doktoru dosent Natiq Alışov yaxından kömək göstərib. Şöbə müdirinin səfirlə birgə İsmayıllı, Qəbələ, Oğuz, Şəki, Qax, Zaqatala, Balakən, Gədəbəy və Qarabağ bölgələrinə səfərləri təşkil edilib. Həmin regionlarda Qafqaz Albaniyasına aid yaşayış yerlərinə, arxeoloji tədqiqat sahələrinə, məbədlərə, alban xristian irsi və memarlıq abidələrinə birgə baxış keçirilib və dolğun məlumatlar əldə olunub.
Kitabda bu bölgələrdə mövcud alban abidələri və memarlıq nümunələri haqqında məlumatlar və tarixi faktlar səfir Auqusto Massarinin müstəqil fəaliyyətinin nəticəsi olaraq təqdim edilir.
“Qafqaz Albaniyası itmiş çarlıq. Azərbaycanda və Şərqi Qafqazda tədqiqatlar və kəşflər” kitabı XXI əsrdə Qafqaz Albaniyası dövlətinin tarixi, arxeologiyası və memarlığı haqqında dünya ictimaiyyətinə təqdim olunmuş ilk nümunə kimi qəbul edilir.
Bölmənin digər xəbərləri
