İtaliyanın sabiq daxili işlər naziri məhkəmə qarşısına çıxacaq
Roma, 19 aprel, AZƏRTAC
İtaliyanın Siciliya regionunun mərkəzi şəhəri olan Palermonun məhkəmələrindən biri sabiq daxili işlər naziri Metteo Salviniya qarşı məhkəmə işi açıb.
AZƏRTAC xəbər verir ki, M.Salviniyə qarşı vəzifə səlahiyyətlərindən sui-istifadə və azadlığın məhdudlaşdırılması maddələri ilə ittiham irəli sürülüb. Nazir olduğu dövrdə yürütdüyü anti-miqrasiya siyasəti ilə beynəlxalq arenada da səs-küyə səbəb olan M. Salvini 2019-cu ilin avqustunda Aralıq dənizində qaçqınları xilas edən “Open Arms” gəmisindəki 147 miqrantın İtaliya sahillərinə yan almasına, eləcə də sərbəst hərəkətinə imkan verməməkdə günahlandırılır.
Məhkəmənin ilk iclası sentyabrın 15-də baş tutmalıdır. M. Salvinin vəkili mətbuata verdiyi açıqlamada bildirib ki, ölkənin sərhədini qorumaq hər bir vətəndaşın vəzifəsidir və məhkəmə qarşısına başıuca çıxacaq M. Salvini yalnız vəzifə öhdəliklərini yerinə yetirib.
M.Salvini isə açıqlamasında qeyd edib ki, həmin gəminin sərbəst hərəkətinə qadağa o vaxt Baş nazir olmuş Cüzeppe Kontenin razılığı əsasında qoyulub. Məhkəmədə irəli sürülən ittihamlar üzrə təqsiri sübut olunarsa, M.Salvini 15 ilədək azadlıqdan məhrum edilə bilər.
Elgün Niftəli
AZƏRTAC-ın xüsusi müxbiri
Roma
Bölmənin digər xəbərləri
