İzmir zəlzələsindən sonra bölgədə 190 mindən çox binanın vəziyyəti araşdırılıb

23.11.2020 [15:36]
Çap et
A⁺ A^-

İstanbul, 23 noyabr, AZƏRTAC

Türkiyənin İzmir vilayətində baş verən zəlzələdən sonra bölgədə ümumilikdə 190 mindən çox bina və 900 müstəqil ərazidəki vəziyyət araşdırılıb.

AZƏRTAC xəbər verir ki, zəlzələnin nəticələri ilə bağlı araşdırma Türkiyənin ətraf mühit və şəhərsalma naziri Murat Kurumun rəhbərliyi altında aparılıb.

İzmirin 23 rayonunda aparılan ilkin araşdırmalarda 1 200 mütəxəssis iştirak edib.

Araşdırmaların ikinci mərhələsində bölgəyə Türkiyənin 81 vilayətindən 643 inşaat mühəndisi və memar cəlb edilib. Onlar tərəfindən şəhərin 26 rayonunun 241 məhəlləsində vəziyyət araşdırılıb.

Zəlzələnin fəsadları ilə bağlı hazırlanan hesabat Türkiyə Daxili İşlər Nazirliyinin nəzdində fəaliyyət göstərən Fövqəladə Halların İdarə Olunması Agentliyinə (AFAD) göndərilib.

Xatırladaq ki, bu il oktyabrın 30-da Türkiyənin İzmir vilayətində baş verən 6.6 bal gücündə zəlzələ nəticəsində 116 nəfər həlak olub.

Günel Məlikova

AZƏRTAC-ın xüsusi müxbiri

İstanbul