“Jumeirah Bilgah Beach Hotel”in baş meneceri Azərbaycan Turizm İnstitutunda olmuşdur
Bakı, 30 yanvar (AZƏRTAC). Azərbaycan Turizm İnstitutu (ATİ) Məzunlar Assosiasiyasının təşəbbüsü ilə “Jumeirah Bilgah Beach Hotel”in baş meneceri Mete Atakuman ilə görüş keçirilmişdir.
ATİ-dən AZƏRTAC-a bildirmişlər ki, görüşdə institutun rektoru, professor Cəfər Cəfərov rəhbərlik etdiyi ali məktəbin fəaliyyəti, ölkə turizminin inkişafı üçün ixtisaslı kadr hazırlığına xidmət edən təhsil-təcrübə-təlim-tədqiqat formulunun faydalılığından danışmışdır. O, ATİ-nin strateji planında bu formulanın uğur qazanacağına əminliyini vurğulamışdır. Qeyd etmişdir ki, Məzunlar Assosiasiyası belə bir görüşü keçirməklə, məhz təhsil və sənayenin əlaqəsi funksiyasının icrası mexanizminə nail olmaqda maraqlıdır. Məqsədimiz yaxın vaxtlarda ATİ karyera mərkəzinin fəaliyyətini gerçəkləşdirməkdir.
M.Atakuman görüşdən məmnunluğunu bildirmiş, ölkəmizə, Bakıya xüsusi sevgisinin izahı kimi hər bir işgüzar səfərində Azərbaycana həsr olunmuş xüsusi təqdimatı ATİ-də də nümayiş etdirmişdir. “Jumeirah” qrupunun ilk dəfə Dubayda otel fəaliyyətinə başladığını, hazırda bu rəqəmin 12-yə, 2015-ci ilədək isə 50-yə çatdırılacağını bildirmiş, tələbələrin, o cümlədən ATİ məzunlarının “Jumeirah”da fəaliyyət göstərəcəklərinə əminliyini vurğulamışdır.
Sonda M.Atakuman sualları cavablandırmışdır.
Bölmənin digər xəbərləri
