“JURNALİSTLƏRİN EKOLOGİYA MƏKTƏBİ” AÇILMIŞDIR
Bakı, 3 avqust (AZƏRTAC). Avqustun 3-də Ekologiya və Təbii Sərvətlər Nazirliyində “Jurnalistlərin ekologiya məktəbi”nin açılışı olmuşdur.
Açılışda ekologiya və təbii sərvətlər naziri Hüseynqulu Bağırov tədbirin əhəmiyyətindən danışmışdır. Hazırda dünyada ekoloji problemlərin çox aktual olduğunu deyən nazir bildirmişdir ki, tədbirin məqsədi jurnalistlərin ekoloji mövzuda məlumatlılığının artırılması, bu sahədə ixtisaslaşdırılmasıdır.
Nazir vurğulamışdır ki, təxminən 6 ay davam edəcək məktəbdə nazirliyin mütəxəssisləri ekoloji siyasətə dair müxtəlif mövzularda mühazirələr oxuyacaq, jurnalistləri ətraf mühitin mühafizəsinin problemləri, bu sahə ilə bağlı dövlət proqramları ilə tanış edəcəklər. Məktəbi bitirən jurnalistlərə sertifikatlar veriləcəkdir.
Tədris proqramının daha da zənginləşdirilməsinin zəruri olduğunu deyən H.Bağırov jurnalistlərə müxtəlif regionlarda təcrübə keçmək imkanının da yaradılacağını qeyd etmişdir.
Qeyd edək ki, layihədə 25 jurnalist iştirak edir.
Bölmənin digər xəbərləri
