“KARL STORZ” ŞİRKƏTİ AZƏRBAYCANDA KEÇİRİLƏCƏK BEYNƏLXALQ SƏRGİYƏ BÖYÜK ÜMİDLƏRLƏ QATILACAQ

23.05.2006 [17:58]
Çap et
A⁺ A^-

Dünya miqyasında texniki endoskopların istehsalçısı olan Almaniyanın “Karl Storz” şirkəti iyunun 6-9-da Bakıda keçiriləcək 13-cü Beynəlxalq Xəzər neft, qaz, neftayırma və neftkimyası sərgisində iştirak edəcəkdir. Şirkət sənayenin enerji, neft və təbii qaz sahələrində, nasos və kompressorlara texniki xidmət işində, aviasiya, avtomobil və poladtökmə sənayesində və digər sahələrdə istifadə olunan texniki endoskoplar nümayiş etdirəcəkdir.

“Karl Storz” şirkətinin Türkiyədəki rəsmi distribüteri Mehmet Öğreten AZƏRTAC-ın müxbiri ilə söhbətində bildirmişdir: “50 il əvvəl Almaniyada təşəkkül tapmış şirkətimizin hazırda ABŞ, İtaliya, Fransa, Böyük Britaniya, Yaponiya, Sunqapur, Rusiya, Hindistan və digər ölkələrdə rəsmi distribüterləri fəaliyyət göstərir. Azərbaycan neft ölkəsidir və inanırıq ki, şirkətin məhsullarına burada daha böyük maraq olacaq. İştirak edəcəyimiz Bakı neft-qaz sərgisi Cənubi Qafqaz regionunda yeganə beynəlxalq tədbirdir və biz ümid edirik ki, yeni işgüzar əməkdaşlığın qurulmasında, Azərbaycanda fəaliyyət dairəmizin genişləndirilməsində onun müstəsna rolu olacaqdır”.

M.Öğretenin sözlərinə görə, texniki endoskopların tətbiq dairəsi çox genişdir. Azərbaycanda da onun tətbiq sahələri çoxdur.