DÜNYA
KARLA DEL PONTE MLADİÇİN VƏ KARACİÇİN TEZLİKLƏ HƏBS OLUNMALARINI TƏLƏB EDİR
Xanım Del Ponte bildirmişdir ki, prosesdə 295 şahid dinlənilmiş, məhkəmə iclaslarının keçirildiyi günlərin sayı isə 466 olmuşdur. Prosesin başa çatmadığı və hökmün çıxarılmadığı da dərin təəssüf doğurur. Buna baxmayaraq, digər yüksəkvəzifəli rəhbər işçilərə qarşı da Miloşeviçin təqsirləndirildiyi eyni cinayətlərin törədilməsi ilə əlaqədar ittihamlar irəli sürülmüşdür. Bir qədər sonra, elə bu il Srebrenitsada soyqırımı törətməkdə təqsirləndirilən yüksəkvəzifəli şəxslərin məhkəməsi başlanacaq, Serbiyanın sabiq rəhbərləri Kosovoda törətdikləri cinayətlərə görə məhkəmə qarşısında cavab verəcəklər.
Prokuror demişdir: “Lakin başlıca müqəssirlər hələ də azadlıqdadır. Ratko Mladiçin və Radovan Karaciçin mümkün qədər tezliklə həbsə alınıb, Haaqaya gətirilmələrini indi daha səbirsizliklə gözləyirəm. Miloşeviçin ölümü onların ədalət mühakiməsi qarşısında cavab vermələrini daha da təxirəsalınmaz edir”.