Karlo Ançelotti Neymarın dünya çempionatında iştirak şansını dəyərləndirib
Bakı, 1 dekabr, AZƏRTAC
Braziliya millisinin baş məşqçisi Karlo Ançelotti "Santos"un hücumçusu Neymarın 2026-cı il dünya çempionatında iştirak etmək şansını dəyərləndirib.
AZƏRTAC xəbər verir ki, italiyalı mütəxəssis bunun üçün öz şərtini açıqlayıb.
O bildirib ki, ulduz futbolçu yalnız 100 faiz hazır olacağı halda mundial üçün heyətə daxil ediləcək: “Hücum xəttində yüksək səviyyədə rəqabət var. Ona görə də ideal formada olan futbolçuları seçməliyəm. Bu, yalnız Neymara aid deyil. Məsələn, bu, Vinisius Junior da ola bilər. Əgər Vinisius 90 faiz formada olarsa, mən onun yerinə tam hazır olan başqa bir oyunçunu milliyə çağıracağam. Neymar çox istedadlıdır. Sadəcə, zədələr ona imkan vermir. Buna görə də pik formasına çata bilmir”.
Qeyd edək ki, dünya çempionatı iyunun 11–dən iyulun 19-na qədər ABŞ, Kanada və Meksikada keçiriləcək. Mundialda ilk dəfə 48 yığma mübarizə aparacaq.
Bölmənin digər xəbərləri
