Kir Starmer istefa çağırışlarına qarşı mübarizə aparacağını bildirib
London, 19 iyun, AZƏRTAC
Böyük Britaniyanın Baş naziri Kir Starmer lideri olduğu Leyboristlər Partiyasında artan təzyiqlərə baxmayaraq, vəzifəsindən getməyəcəyini və hər hansı siyasi çağırışa qarşı mübarizə aparacağını bəyan edib.
AZƏRTAC “Reuters”ə istinadla xəbər verir ki, bu bəyanat Leyboristlər Partiyasının tanınmış simalarından biri, Böyük Mançester meri Endi Börnhamın İngiltərənin şimal-qərbində yerləşən Makerfild seçki dairəsində keçirilən aralıq parlament seçkisində qalib gələrək parlament mandatı qazanmasından sonra səsləndirilib.
Börnhamın inamlı qələbəsi onun gələcəkdə Leyboristlər Partiyasının liderliyi uğrunda yarışa qoşula biləcəyi ilə bağlı ehtimalları gücləndirib. O, artıq Starmeri əvəz etmək üçün keçirilə biləcək hər hansı liderlik yarışında iştirak etməyə hazır olduğuna işarə edib.
Makerfilddə əldə olunan nəticədən sonra bəzi leyborist deputatlar Starmerin partiya rəhbərliyindən geri çəkilərək hakimiyyətin Börnhama nizamlı şəkildə ötürülməsini nəzərdən keçirməli olduğunu bildiriblər. Baş nazir son aylarda həm ictimai rəy sorğularında populyarlığının azalması, həm də sağçı populist Reform UK partiyasının artan dəstəyi fonunda təzyiqlərlə üzləşir. Əgər Starmer vəzifəsini tərk etsə, Böyük Britaniya son on ildən bir qədər artıq müddətdə yeddinci Baş nazirini görmüş olacaq.
Bölmənin digər xəbərləri
