Klaypeda da Xocalı soyqırımı qurbanları yad edilib
Klaypeda, 26 fevral, AZƏRTAC
“Xocalıya ədalət!” beynəlxalq kampaniyası çərçivəsində Azərbaycan Respublikasının Litvadakı səfirliyinin dəstəyi ilə Klaypeda azərbaycanlılarının “Azəris” cəmiyyəti Xocalı soyqırımına həsr edilmiş anım mərasimi keçirib.
AZƏRTAC xəbər verir ki, Klaypeda şəhərinin Milli Mədəniyyətlər Sarayında keçirilən tədbirdə şəhər administrasiyasının nümayəndələri, xarici ölkələrin fəxri konsulları, burada fəaliyyət göstərən milli icmaların rəhbərləri, yerli sakinlər və soydaşlarımız iştirak ediblər.
Xocalı qurbanlarının xatirəsi bir dəqiqəlik sükutla yad edildikdən sonra “Azəris” cəmiyyətinin sədri Əliağa Məmmədov tədbir iştirakçılarına xalqımızın XX əsrdə yaşadığı ən dəhşətli faciəsi barədə geniş məlumat verib, Xocalı soyqırımını törədənlərin hələ də cəzalandırılmadığını diqqətə çatdırıb.
Azərbaycanın Litvadakı müvəqqəti işlər vəkili Atəş Qırxıyev dünyanın dörd bir yanında Xocalı soyqırımına həsr olunmuş tədbirlərin təşkil edildiyini bildirib, xalqımızın kədərinə şərik olan hər kəsə təşəkkür edib. Diplomat vurğulayıb ki, azərbaycanlıları faciə qurbanlarının xatirəsi və dünyanın bir çox ölkələrinin xalqımızla həmrəyliyi birləşdirir. Biz artıq 26 ildir ki, Xocalı faciəsinin ağrısını yaşayırıq və dünyada bir daha belə bir soyqırımının təkrarlanmaması üçün bu qətliamı şiddətlə qınayırıq.
Sonra azərbaycanlılara qarşı törədilən erməni vəhşiliklərinə şahidlik edən litvalı hərbi jurnalist Riçardas Lapaytis çıxış edib. Litva Jurnalistlər İttifaqının üzvü deyib: “Mən sizə öz gözlərimlə gördüyüm haqda danışmaq istəyirəm. Azərbaycana gələndə mənim 23 yaşım var idi. Bu yaşda bir gəncin Qarabağda gördüyü dəhşətləri bir anlıq gözünüzün önünə gətirin. Evə qayıdanda gördüklərimi yazdım. Əvvəlcə Litvada mənə inanmırdılar, deyirdilər: “Axı bu necə ola bilər? İndiki dövrdə insanlar bunu necə edə bilərlər?”. Xocalılıları onların pənah yeri olan Ağdam şəhəri ilə cəmi on yeddi kilometr məsafə ayırırdı. Bir tərəfdə ölüm, o biri tərəfdə həyat, bir tərəfdə insanlıqdan çıxmış orta əsr düşüncəli vəhşilərin yaratdığı mühit, digər tərəfdə son quru çörəyini paylaşan insanlar. Bir tərəfdə iblisə xidmət edənlər, o biri tərəfdə haqqa, ədalətə inananlar. Cəmi 17 kilometr. Bu dəhliz milyonlarla insanın ümid yeri idi, lakin bəşəriyyətin qara ləkəsinə çevrilən sonsuz bir məsafə oldu. Dinc sakinlərə hücum edənlər arasında xüsusi döyüş təcrübəsi keçmiş altı qrupdan ibarət quldurlar var idi. Onlar Suriya və Livan ermənilərindən və Əfqanıstan savaşı görmüş cəlladlardan təşkil olunmuşdular. Bu gün yerli camaatın hansı vəziyyətdə olduğunu belə təsəvvür etmək çox çətindir. Daimi gülləboran altında yaşamaq, ərzaq göndərilmir, komendant saatı, mağazalar işləmir, şəhərdə su qıtlığı... Şaxtalı bir gündə donmuş ayaqları ilə ayaqyalın sanitar qatarına gələnlər onlara kömək olunacağına ümid edirdilər. O qorxunc fevral günləri qar qan rənginə boyanmışdı. Əsir düşənlər üçün Əsgəran qalası tam bir cəhənnəmə dönmüşdü. Orada qadınlara, kişilərə divan tuturdular. Gördüklərimi heç kabus dolu yuxuda da görə bilməzsiniz. Bu gün də mənim Xocalı yaram sızlayır.
Günahsız öldürülənlər, onların yaxınları qarşısında baş əyirəm və öz gözlərimlə gördüyüm o dəhşətli soyqırımına şahidlik etməyi hər fürsətdə özümə borc bilirəm”.
Sonra Klaypeda şəhərində fəaliyyət göstərən Azərbaycan bazargünü məktəbinin müəlliməsi Rəna Məmmədovanın təşkilatçılığı ilə litvalı musiqiçilər Anastasiya, Natalya və Andrey Vostryakovların ifasında xatirə rekviyemi ifa olunub, məktəbli Məhəmməd və Mahmud Məmmədov qardaşları Xocalı faciəsinə həsr edilən şeir səsləndiriblər.
Tədbirdə Heydər Əliyev Fondu tərəfindən hazırlanan sənədli film Litva dilində nümayiş olunub, Xocalı faciəsinə aid kitab və broşürlər paylanılıb.
İştirakçılar “Xocalı” sözünün yazıldığı xüsusi kompozisiyada 613 ədəd şam yandırıblar.
Nigar Cəfərli
AZƏRTAC-ın xüsusi müxbiri
Klaypeda
Bölmənin digər xəbərləri
