“Konq-rey” qasırğası Tayvanda 3 nəfərin ölümünə səbəb olub VİDEO
Pekin, 1 noyabr, AZƏRTAC
İlin 21-ci qasırğası olan “Konq-rey” Çinin Tayvan adasında ən azı 3 nəfərin ölümünə, 73 nəfərin xəsarət almasına, xeyli dağıntıya səbəb olub.
AZƏRTAC Çin mediasına istinadla xəbər verir ki, oktyabrın 31-də günortadan sonra adanın şərq sahillərinə çatan “Konq-rey” şiddətli yağış və güclü külək gətirib. Səlahiyyətli orqanlar məktəblərin, iş yerlərinin bağlanmasına, uçuşların, qatar və bərə səfərlərinin təxirə salınmasına qərar verib. Təxminən 10 min sakin təxliyə edilib.
Şimala doğru saatda 35 kilometr sürətlə hərəkət edən qasırğa Tayvan boğazını keçərək Çinin materik hissəsindəki Cıcian, Ciansu və Fucien əyalətlərinə çatıb. Meteoroloqlar bu bölgələrdə şiddətli yağış və güclü külək barədə xəbərdarlıq edib. Sahildə balıqçılıq təsərrüfatlarında çalışanlar təxliyə edilib, qayıqlar sahilə qayıdıb, dənizdə və sahildə tikinti işləri dayandırılıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
