Koronavirusun Böyük Britaniya ştammına görə Osloda sərt məhdudlaşdırıcı tədbirlər tətbiq olunur
Stokholm, 24 yanvar, AZƏRTAC
Böyük Britaniyada mutasiya edən virusun qəfildən yayılması Norveç hakimiyyətini qəti tədbirlər görməyə məcbur edib.
AZƏRTAC xəbər verir ki, Norveçin paytaxtı Oslo şəhərində mutasiya edən koronavirus epidemiyasının ardınca sərt məhdudlaşdırıcı tədbirlərin tətbiq edilməsi ilə bağlı qərar qəbul edilib.
Koronavirusun yeni Böyük Britaniya ştammı Oslo paytaxtı yaxınlığında Nordre Follo Norveç bələdiyyəsində yayılmağa başlayıb. Yerli hakimiyyət virusun bölgəyə necə düşdüyünü bilmədiyindən xüsusilə narahatdır. Təcili olaraq səlahiyyətlilər, Nordre Follo bələdiyyəsində ilk növbədə və indi də Osloda sərt məhdudlaşdırıcı tədbirlərin tətbiq edilməsi barədə qərar qəbul ediblər.
Bütün bunlardan başqa, hökumətin qərarı ilə, zəruri ehtiyaclar siyahısına daxil olmayan bütün mağazalar bağlanacaq, insanların həm evdə, həm də açıq havada toplanması qadağan ediləcək, xüsusilə otaqlarda və qrup şəklində idmanla məşğul olmaq da qadağa olunacaq.
Qaydalar şənbə günü saat 12-dən etibarən qüvvəyə minir və yanvarın 31-dək qüvvədədir.
“Bu, yoluxma yolunu bilmədiyimiz Norveçdə virus ştammının yayılmasının ilk nümunəsidir”, - deyə Norveçin səhiyyə naziri Bent Xoye yerli jurnalistlərə verdiyi müsahibəsində bildirib.
Qeyd edək ki, yeni tədbirlər pandemiyanın başlanmasından bəri Osloda ən sərt olaraq xarakterizə olunur.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
