KÜR ÇAYININ SABİRABAD RAYONUNA VURDUĞU ZİYAN ARADAN QALDIRILIR
Sabirabad, 15 iyul (AZƏRTAC). Kür çayının daşması nəticəsində Sabirabad rayonuna dəyən ziyan aradan qaldırılır. Hazırda Əliləmbəyli kəndindəki su təchizatı stansiyasının fəaliyyəti bərpa edilir.
Kür çayında baş verən daşqın Sabirabad rayonunun Əliləmbəyli kəndindəki 2-ci nasos stansiyasına da ziyan vurmuşdur. Stansiya saniyədə 26 kubmetrdən çox sürətlə qrunt sularını Baş Mil-Muğan Kollektoruna vurur. Bununla da 21 kəndin 51 min hektar əkin sahəsində şoranlaşmanın qarşısı alınır. 2 nasos və 9 aqreqatdan ibarət olan stansiya daşqın nəticəsində 3 metr dərinlikdə suyun altında qalmışdır. Hazırda nasosxananın bərpasına başlanılmışdır. Burada 20-dən çox texnika işləyir. Nasosxana binasının ətrafında torpaq işləri görülür, sızmaların qarşısı alınır.
Sonra “Meliorasiya və Su Təsərrüfatı” Açıq Səhmdar Cəmiyyətinin rayon şöbəsi Novruzlu kəndində təmirə başlayacaqdır. Bu kənddəki 2 nasos stansiyası da su altında qaldığından qəza vəziyyətinə düşmüşdür.
Bölmənin digər xəbərləri
