Kür və Araz transsərhəd çaylarında aparılan monitorinqin nəticələri açıqlanmışdır
Bakı, 24 fevral (AZƏRTAC). Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti tərəfindən Kür və Araz transsərhəd çaylarının çirklənmə vəziyyətini öyrənmək məqsədi ilə fevral ayının ikinci ongünlüyü üçün keçirilmiş monitorinqin nəticələri açıqlanmışdır.
Nazirliyin mətbuat xidmətindən AZƏRTAC-a bildirmişlər ki, monitorinqin nəticələrinə əsasən, Gürcüstan və Ermənistan ərazilərindən təmizlənmədən axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarı normadan dəfələrlə artıq olmuşdur. Suyun tərkibindəki spesifik çirkləndiricilərdən fenollar Şıxlı-2 məntəqəsində 3, Ağstafaçayda 5, Ağstafaçay su anbarında isə 4 dəfə yol verilən qatılıq həddini keçmişdir.
Araz çayının Horadiz, Birinci Şahsevən və Bəhramtəpə məntəqələrində də eyni hal müşahidə olunmuşdur.
Mis birləşmələri isə Kür və Araz çayları üzrə bütün məntəqələrdə norma daxilində tərəddüd etmişdir.
Suyun oksigen rejiminin bütün məntəqələrdə sanitar norma daxilində dəyişdiyi müəyyən olunmuşdur.
Bölmənin digər xəbərləri
