Kür və Araz transsərhəd çaylarında biogen maddələrin miqdarı normadan çoxdur
Bakı, 31 may (AZƏRTAC). Ekologiya və Təbii Sərvətlər Nazirliyi Kür və Araz transsərhəd çaylarının çirklənmə vəziyyətini öyrənmək məqsədi ilə may ayının üçüncü ongünlüyü üçün monitorinq keçirmişdir.
Nazirliyin mətbuat xidmətindən AZƏRTAC-a bildirmişlər ki, monitorinqin nəticələrinə əsasən, Kür çayında su sərfi may ayının ikinci ön günlüyünə nisbətən saniyədə 80 kubmetr azalmışdır. Gürcüstan və Ermənistan ərazilərindən təmizlənmədən axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarının normadan dəfələrlə artıq olması müşahidə olunmuşdur.
Suyun tərkibindəki spesifik çirkləndiricilərdən fenol və mis birləşmələrinin Şıxlı-2 məntəqəsində, Ağstafaçayda və Ağstafaçay su anbarında yol verilən qatılıq həddini keçdiyi qeydə alınmışdır.
Eyni hal Araz çayının Horadiz, Birinci Şahsevən və Bəhramtəpə məntəqələrində müşahidə olunmuşdur.
Suyun oksigen rejiminin isə bütün məntəqələrdə sanitar norma daxilində dəyişdiyi müəyyən edilmişdir.
Bölmənin digər xəbərləri
