KÜTLƏVİ İNFORMASİYA VASİTƏLƏRİ ARASINDA FUTZAL ÜZRƏ “XATİRƏ KUBOKU” TURNİRİ START GÖTÜRMÜŞDÜR
Bakı, 20 iyun (AZƏRTAC). İyunun 20-də ümummilli lider Heydər Əliyevin Azərbaycanda ilk dəfə hakimiyyətə gəlişinin 40-cı ildönümünə həsr olunmuş jurnalistlər arasında futzal üzrə “Xatirə kuboku” turnirinə start verilmişdir.
Yarışın açılış mərasimində çıxış edən turnirin təşkilatçısı “Yeni Azərbaycan” qəzetinin baş redaktoru Hikmət Babaoğlu ulu öndərin mətbuatın inkişafına daim diqqət və qayğı ilə yanaşdığını bildirmişdir. Milli Məclisin deputatı Aydın Mirzəzadə demişdir ki, hələ ötən əsrin 60-cı illərinədək Azərbaycan sovet respublikaları arasında iqtisadi inkişafına görə geridə qalırdı. Lakin 1969-cu ildə Heydər Əliyevin hakimiyyətə gəlişindən sonra bütün sahələrdə dinamik canlanma müşahidə olunmağa başladı. Heydər Əliyevin həmin ildə hakimiyyətə gəlişi ilə bugünkü müasir müstəqil Azərbaycan dövlətinin inkişaf bünövrəsi qoyuldu.
Mərasimdə Azərbaycan Futzal Federasiyasının prezidenti Zaur Axundov, gənclər və idman nazirliyinin nümayəndələri çıxış edərək turnir iştirakçılarına uğurlar arzuladılar.
Gənclər və İdman Nazirliyinin bazasında (“Neftçi” futbol klubunun keçmiş təlim bazası) keçirilən turnirin ilk günü B qrupunda yarışan Azərbaycan Dövlət Teleqraf Agentliyinin (AZƏRTAC) komandası “Lider TV”-nin kollektivi ilə görüşmüşdür. Oyun 8:3 hesabı ilə “Lider TV”-nin qələbəsi ilə başa çatmışdır.
AZƏRTAC-ın kollektivi növbəti görüşünü iyunun 28-də “Zaman”-“Çempion” qəzetlərinin birləşmiş komandasına qarşı keçirəcəkdir.
Digər görüşlərdə aşağıdakı nəticələr qeydə alınmışdır: “Yeni Azərbaycan”-“Səs qəzeti” - 13:6, “Şərq-525”-“Paritet-Palitra” - 11:6, “Xəzər TV”-“ANS” - 5:2.
Turnirdə 16 komanda 4 qrupda yarışır. Əsasnaməyə görə, qrupda birinci-ikinci yerləri tutmuş komandalar növbəti mərhələyə vəsiqə qazanacaqlar. Dairəvi sistem üzrə keçirilən yarış iyulun 14-də başa çatacaqdır.
######
 |
 |
Bölmənin digər xəbərləri
