Latviya gimnastı dünya kuboku yarışlarında gürzlər ilə təsnifat mərhələsinə liderlik edir
Bakı, 23 aprel, AZƏRTAC
Bakıda keçirilən bədii gimnastika üzrə dünya kuboku yarışlarında gürzlər ilə təsnifat mərhələsinə Latviya təmsilçisi Yelizaveta Polstyanaya liderlik edir.
AZƏRTAC xəbər verir ki, gimnastın çıxışı hakimlər tərəfindən 30,850 xalla qiymətləndirilib.
İlk üçlükdə Macarıstan gimnastı Viktoria Evelin Koçsis (29,900 xal) və israilli Daria Atamanov (29,500) yer alıblar.
Bu, Azərbaycanın gimnastika növləri üzrə bu il ev sahibliyi etdiyi 5-ci beynəlxalq yarışdır. Yarışda 31 ölkədən 42-si fərdi və 84-ü qrup komandasının (14 qrup) üzvü olmaqla, 126 gimnast iştirak edir.
Aprelin 24-dək davam edəcək yarışda gimnastlar ayrı-ayrı alətlər və çoxnövçülük üzrə mübarizə aparacaqlar.
Ənənəyə uyğun olaraq, turnirdə ən çox icra xalını yığmış gimnast və qrup komandasına ənənəvi “AGF Trophy” kuboku da təqdim olunacaq.
Bu, ölkəmizdə bədii gimnastika üzrə təşkil olunan doqquzuncu dünya kuboku yarışıdır. Xatırladaq ki, paytaxtımız 2005-ci və 2019-cu illərdə bu növ üzrə dünya çempionatına ev sahibliyi edib.
Bölmənin digər xəbərləri
