Litvada özünütəcrid rejimində qalma müddətinin azaldılması nəzərdən keçirilir
Vilnüs, 5 sentyabr, AZƏRTAC
Litvada özünütəcrid rejimi müddətinin azaldılması məsələsi müzakirə olunur. Bunun üçün özünütəcridin 7-9-cu günü test müayinəsindən keçmək tələb olunur. Çünki məhz o zaman koronavirusa yoluxma faktını müəyyənləşdirmək mümkün olar.
AZƏRTAC Litva mətbuatına istinadla xəbər verir ki, bu sözləri ölkənin səhiyyə Naziri Aureliyus Veriqa “Žinių radijаs” radiosuna müsahibəsində bildirib.
O, hazırda bölgələrdə yoluxma ocaqlarının idarə edilməsinə və virusun şəhərlərdə yayılmasının qarşısının alınmasına daha çox diqqət yetirildiyini vurğulayıb.
“Vəziyyətin idarə olunması ilə bağlı digər şərtlər daha çox lokal xarakter daşıyır. Bu, konkret bir vəziyyətə − şəhərlərdə baş verənlərə göstərilən reaksiyadır. Belə hallarda test müayinələri aparılır, daha çox yoluxma ocağının necə müəyyənləşdirilə biləcəyi araşdırılır”, - deyə nazir əlavə edib.
A.Veriqa tibb müəssisələri üçün zəruri olan daha tez başa gələn operativ test metodlarının əldə olunması niyyətini xatırladıb.
“Təcili yardıma ehtiyacı olan xəstələrə gəldikdə, onların virusa yoluxub-yoluxmadıqlarını müəyyən etmək mütləqdir”, - deyə nazir söyləyib.
Asiman Əsədov
AZƏRTAC-ın xüsusi müxbiri
Vilnüs
Bölmənin digər xəbərləri
