Macarıstanın Milad ənənəsinin ayrılmaz hissəsi olan “salonçukor” bazarı dəyişir
Budapeşt, 18 dekabr, AZƏRTAC
Macarıstanda Milad bayramının simvollarından sayılan salon konfetləri - salonçukor - yüz ildən artıq tarixə malik olmasına baxmayaraq, bu gün də bayram mövsümünün vacib elementi olaraq qalır. Bu şirniyyatlar təkcə ölkə daxilində deyil, həmçinin xaricdə yaşayan macar icmaları arasında da böyük populyarlıq qazanıb.
AZƏRTAC xəbər verir ki, bu ölkənin Milli Kənd Təsərrüfatı Palatası (NAK) və Macarıstan Şirniyyat İstehsalçıları Assosiasiyasının birgə icmalına görə, ölkədə hər il 3-3,5 min ton salonçukor istehlak olunur. Bununla yanaşı, bazarda nəzərəçarpacaq dəyişikliklər baş verir: dadlar, reseptlər və istehlakçı seçimləri tədricən yenilənir.
Mütəxəssislər istehlakçı davranışında iki əsas istiqamətin formalaşdığını qeyd edirlər. Bir tərəfdən klassik və nostalji dadlara maraq yüksək olaraq qalır. Jel konfetlər, kokoslu, marzipanlı və qozlu növlər Milad bəzəklərini və bayramın tanış ətirlərini xatırlatdığı üçün lider mövqedədir. Digər tərəfdən, innovasiya və premium seqment sürətlə inkişaf edir. Armud, qaragilə, romlu və ya qırmızı şərablı gavalı, fıstıq və qozlu içliklərə malik konfetlər getdikcə daha çox alıcı cəlb edir. İstehlakçılar artıq keyfiyyətdən güzəştə getmək istəmir və yüksək keyfiyyətli məhsullara üstünlük verirlər.
Bundan əlavə, əl istehsalı və yerli şirniyyatlara maraq artır. Artan xammal xərclərinə baxmayaraq, macar şirniyyat sənayesi ənənəni qoruyaraq yeniliklərə uyğunlaşmağı bacarır.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
