Tbilisi, 25 may, AZƏRTAC

Mayın 25-də Gürcüstanın Marneuli şəhərindəki “Marneuli İctimai Kolleci”ndə Azərbaycanın və Gürcüstanın Dövlət Müstəqilliyi günlərinə həsr olunmuş bayram tədbiri keçirilib.

AZƏRTAC xəbər verir ki, Gürcüstan Azərbaycanlıları Konqresinin (GAK) və “Marneuli İctimai Kolleci”nin birgə təşkil etdikləri tədbirdə Azərbaycanın bu ölkədəki səfir Faiq Quliyev, səfirliyin əməkdaşları, Marneuli şəhərinin meri Kənan Ömərov, Marneuli Bələdiyyə Məclisinin sədri Amiran Giorqadze, bələdiyyə üzvləri, ətraf rayonlardan gəlmiş qonaqlar və ictimaiyyət nümayəndələri iştirak ediblər.

Əvvəlcə Azərbaycan və Gürcüstanın Dövlət himnləri səsləndirilib. Sonra məktəblilər Azərbaycan və Gürcüstanın müstəqillik mübarizəsi və əldə olunan uğurlar barədə ətraflı məlumat veriblər.

Daha sonra GAK sədri Hüseyn Yusubov, kollecin meneceri Ləman Bayramova iştirakçıları bayram münasibətilə təbrik edib. H.Yusubov Azərbaycan Ordusunun 44 günlük Vətən müharibəsindəki qələbəsindən danışıb. O, bu qələbənin Gürcüstanda yaşayan soydaşlarımızda qürur hissi yaradığını xüsusi qeyd edib. Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə işğaldan azad olunmuş ərazilərin tezliklə abad bölgələrə çevriləcəyinə inandığını bildirib. GAK sədri tezliklə Gürcüstan ərazilərinin də işğaldan azad ediləcəyinə ümid etdiyini bildirib.

Məktəblilər M.Ə.Rəsulzadənin və Noe Jordaniyanın Müstəqillik Günü ilə bağlı söylədikləri fikirlərini səsləndiriblər.

Səfir Faiq Quliyev çıxış edərək Azərbaycan və gürcü xalqlarını bayram münasibətilə təbrik edib. Səfir Azərbaycan və Gürcüstanın müstəqillik uğrunda mübarizə tarixinə nəzər salıb. Bildirib ki, Azərbaycan müsəlman Şərqində ilk demokratik respublika qurub. Həmin dövrdə ordu quruculuğuna, təhsilə xüsusi diqqət yetirilib. İlk dəfə qadınlara seçki hüququ verilib. Lakin müəyyən səbəblərdən müstəqilliyimizi itirsək də, ötən əsrin 90-cı illərində hər iki xalq öz dövlət müstəqilliyini yenidən bərpa edib. Lakin bu dəfə də bəzi xarici qüvvələrin təzyiqi ilə müstəqilliyimiz itirmək təhlükəsi ilə üzləşmişdik. O zamankı ağır vəziyyətdə hər iki xalq özünün müdrik liderlərinə Heydər Əliyevə və Eduard Şeverdnadzeyə müraciət etdilər. Məhz bu iki siyasi və dövlət xadiminin səyi nəticəsində dövlət müstəqilliyimizi qoruduq və möhkəmləndirdik.

Diplomat Azərbaycanın və Gürcüstanın birgə səyi nəticəsində regionda həyata keçirilən irimiqyaslı enerji və nəqliyyat layihələrinin əhəmiyyətindən danışıb.

Sonra o, Azərbaycan Ordusunun 44 günlük Vətən müharibəsindəki Qələbəsindən söz açıb, Gürcüstanda yaşayan soydaşlarımızın dəstəyini xüsusi qeyd edib.

Sonra Marneulinin meri Kənan Ömərov, bələdiyyə sədri Amiran Giorqadze, parlamentin sabiq deputatı Ramiz Bəkirov çıxış edərək bayram münasibətilə təbriklərini çatdırıb, fikirlərini böluşüblər.

Sonda məktəblilər Müstəqillik Gününə həsr olunmuş mahnı və şeirlər ifa ediblər.

Xətayi Əzizov

AZƏRTAC-ın xüsusi müxbiri

Tbilisi