Martın 9-u axşamdan başlayaraq hava şəraitinin dəyişəcəyi, temperaturun xeyli düşəcəyi proqnozlaşdırılır
Bakı, 5 mart, AZƏRTAC
Martın ilk beş günündə düşən yağıntı aylıq normanın 25-50 faizini təşkil edib. Sanki mart fevralda olan yağıntı çatışmazlığını kompensasiya etməyə çalışır.
Bunu AZƏRTAC-a açıqlamasında Milli Hidrometeorologiya Xidmətinin rəisi Umayra Tağıyeva bildirib.
Onun sözlərinə görə, mart ayının ilk günlərində Aralıq dənizi siklonu bol yağıntı gətirib. Ötən günlər ərzində düşən yağıntı Abşeronda 36 faiz, ölkənin şimalında isə aylıq normanın yarıdan çoxunu təşkil edib. Böyük və Kiçik Qafqazın dağ çaylarında suyun səviyyəsi 7-10, Kürün yuxarı axınında isə 26 santimetr yüksəlib.
“Təəssüf ki, güclü qərb küləyi də iz qoymadan keçməyib. Mart ayı həmişə qeyri-sabit havası ilə seçilib və dəfələrlə bizi günəşli isti hava ilə “aldadaraq” qəfil yaxalayıb. İlkin proqnozlara görə, bu ayın ikinci ongünlüyündə də hava şəraiti sürprizlərsiz keçməyəcək”, - deyə U.Tağıyeva qeyd edib.
Xidmət rəisi deyib ki, yaxın üç gündə havanın temperaturunun iqlim normasından yüksək olacağı gözlənilsə də, martın 9-u axşamdan başlayaraq hava şəraitinin dəyişəcəyi, temperaturun xeyli düşəcəyi proqnozlaşdırılır. Temperatur hətta Abşeron yarımadasında belə fevral ayı ilə müqayisədə aşağı olacaq, 4-9 dərəcə isti təşkil edəcək.
U.Tağıyevanın sözlərinə görə, ikinci ongünlüyün birinci yarısında buludlu hava şəraitinin üstünlük təşkil edəcəyi, arabir yağıntılı olacağı, dağlıq rayonlarda qar yağacağı ehtimal edilir.
Bölmənin digər xəbərləri
