Masallıda yaşayış yerini tərk edən daha iki koronavirus xəstəsi saxlanılıb
Masallı, 7 yanvar, Bağır Əliyev, AZƏRTAC
Masallı Rayon Polis Şöbəsinin əməkdaşlarının keçirdiyi yoxlamalar zamanı yaşayış yerini tərk edən daha iki aktiv koronavirus xəstəsi aşkarlanıb.
Daxili İşlər Nazirliyinin mətbuat xidmətinin Lənkəran regional qrupundan AZƏRTAC-ın bölgə müxbirinə verilən məlumata görə, Cəlilabad rayon sakinləri İ.Səmədov və X.Dövlətova COVID-19 infeksiyası testinin pozitiv nəticəsinə görə ev şəraitində müalicə təyin olunub və onlara yaşayış yerini tərk etməmələri tapşırılıb.
Polis əməkdaşlarının keçirdiyi müvafiq tədbirlərlə həmin şəxslərin karantin qaydalarını kobud şəkildə pozaraq yaşayış yerlərini tərk etdiyi müəyyənləşib.
İ.Səmədov Masallı şəhəri ərazisində ictimai yerdə, X.Dövlətov isə şəhərin giriş hissəsində qurulmuş stasionar postlardan birində yoxlamalar zamanı aşkarlanaraq yaşadıqları ünvanlara geri qaytarılıblar.
Həmin şəxslərin törətdiyi əmələ hüquqi qiymət verilməsi üçün Masallı Rayon Polis Şöbəsinin istintaq bölməsində araşdırmalar aparılır.
Bölmənin digər xəbərləri
