MƏDƏNİYYƏT MƏRKƏZİNDƏ AZƏRBAYCAN MƏKTƏBİ AÇILMIŞDIR
AZƏRTAC-ın xüsusi müxbiri xəbər verir ki, mərasimdə mərkəzin nümayəndələri, Özbəkistandakı səfirliyimizin əməkdaşları, valideynlər iştirak etmişlər.
Səfir Aydın Əzimbəyov bu münasibətlə şagirdləri və valideynləri təbrik edərək demişdir: Biz bu günü çoxdan gözləyirdik. Nəhayət, o gün gəlib çatdı və sizin ayrıca geniş, işıqlı sinif otağınız var. Burada öz dilinizi öyrənməklə yanaşı, Azərbaycanın tarixi, ədəbiyyatı, incəsənəti, mədəniyyəti ilə də tanış olacaqsınız. Sizin ixtiyarınıza kompüter və televizor otaqları verilmişdir. Burada Azərbaycanın dörd televiziya kanalına baxa biləcəksiniz.
Sinif otağını Azərbaycanın Dövlət Gerbi və Bayrağı, Azərbaycan və Özbəkistan prezidentlərinin şəkilləri, qədim və müasir Bakının təsvirləri bəzəyir.
Məktəbin rəhbəri Sultan Xankişiyev, müəllim Gülşən Axundova və valideynlər çıxış edərək, səfir Aydın Əzimbəyova, Azərbaycan Mədəniyyət Mərkəzinin sədri İsmayıl Məmmədova minnətdarlıqlarını bildirmişlər.
