DÜNYA
Mərakeş və İsrail bu ölkələrdə səfirliklərin açılması prosesinin detallarını müzakirə edirlər
Rabat, 9 yanvar, AZƏRTAC
Mərakeş və İsrail arasında 10 dekabr 2020-ci il tarixdə əldə edilmiş razılaşmaya əsasən, iki ölkə arasında münasibətlərin tədricən normallaşdırılması çərçivəsində, müvafiq surətdə, Təl-Əvivdə və Rabatda bu ölkələrin səfirliklərinin açılması planlaşdırılır.
AZƏRTAC Mərakeş KİV-lərinə istinadla xəbər verir ki, kral VI Məhəmməd və İsrailin Baş naziri Benyamin Netanyahu telefon danışığı zamanı iki ölkədə diplomatik nümayəndəliklərin açılması prosesinin detallarını müzakirə ediblər.
Mərakeş və İsrail arasında münasibətlərin bərpası çərçivəsində bu ölkələr arasında ilk aviareyslər fəaliyyətə başlayacaq. Mərakeşi İsraillə bağlayacaq planlaşdırılmış reyslərin sayı rekord həddə olacaq, çünki həftədə 20-dən artıq reysin həyata keçirilməsi gözlənilir.
İki ölkənin rəsmi şəxsləri toxuculuq, qida və tədqiqat sektorlarında ikitərəfli sənaye əməkdaşlığının perspektivlərini də müzakirə ediblər.
Nigar Cəfərli
AZƏRTAC-ın xüsusi müxbiri
Rabat