Mərkəzi Asiyadan miqrasiya istiqamətini dəyişir: Avropa daha cəlbedici olur
Brüssel, 23 mart, AZƏRTAC
Avropa mediasının məlumatına görə, son illərdə Mərkəzi Asiya ölkələrindən olan əmək miqrantlarının istiqamətində mühüm dəyişiklik müşahidə olunur. Ənənəvi olaraq əsas təyinat nöqtəsi sayılan Rusiya tədricən cəlbediciliyini itirir və bu boşluğu qismən Avropa doldurmağa başlayır.
Bildirilir ki, Rusiyada hüquqi məhdudiyyətlərin artması əmək miqrantlarının seçimlərinə təsir göstərir. Nəticədə region ölkələrindən Rusiyaya gedənlərin sayı azalır.
Eyni zamanda, Avropa ölkələrində işçi qüvvəsinə tələbatın artması yeni imkanlar yaradır. Xüsusilə Şərqi Avropa ölkələrində əmək bazarında boşluqlar müşahidə olunur və bu, Mərkəzi Asiya vətəndaşları üçün alternativ istiqamət kimi Avropanın rolunu gücləndirir.
Avropa mediası qeyd edir ki, bəzi Avropa dövlətləri artıq bu regiondan gələn işçilər üçün viza kvotalarını artırıb və işə qəbul proseslərini sadələşdirib. Bu da miqrasiya axınının tədricən yeni istiqamətlərə yönəlməsinə səbəb olur.
Bununla belə, ekspertlər hesab edir ki, Rusiya hələ də əsas əmək bazarı olaraq qalır. Dil baryeri, hüquqi prosedurlar və mədəni fərqlər Avropaya kütləvi keçidi məhdudlaşdıran əsas amillər kimi göstərilir.
Vüqar Seyidov
AZƏRTAC-ın xüsusi müxbiri
Brüssel
Bölmənin digər xəbərləri
