ELM VƏ TƏHSİL
Mərkəzi Elmi Kitabxanada sərgi: “İsa Muğanna- 95”
![Mərkəzi Elmi Kitabxanada sərgi: “İsa Muğanna- 95”](/files/2023/2/1200x630/16865691376303642011_1200x630.jpg)
Bakı, 12 iyun, AZƏRTAC
İyunun 12-si Türk dünyasının böyük yazıçısı İsa Muğannanın (Hüseynov) doğum günüdür. Bu münasibətlə AMEA-nın Mərkəzi Elmi Kitabxanasında (MEK) “İsa Muğanna (Hüseynov) - 95” adlı sərgi təşkil olunub.
MEK-dən AZƏRTAC-a bildirilib ki, sərgidə görkəmli ədibin “Bizim qızlar”, “Dan ulduzu”, “Hekayələr”, “Yanar ürək”, “Doğma və yad adamlar”, “Teleqram”, “Tütək səsi”, “Pyeslər”, “Kollu koxa”, “Ömrümdə izlər”, “Saz”, “Məhşər”, “İdeal”, “Türfə”, “Qəbiristan”, “Cəhənnəm”, “İsahəq-Musahəq” və digər kitabları nümayiş olunur.
Müasir Azərbaycan ədəbiyyatının parlaq simalarından olan İsa Muğanna öz yaradıcılığı ilə milli bədii fikrin zənginləşməsində mühüm rol oynayıb. O, nəsrimizin əsaslı şəkildə yeni mərhələyə qədəm qoymasının fəal iştirakçısı olub. Onun haqqında dünyaşöhrətli yazıçı Çingiz Aytmatov “Bizim hamımız İsa Muğannadan təsirlənmişik və öyrənmişik” deyib.
Qeyd edək ki, sərgi 2 həftə davam edəcək.