Mərkəzi Seçki Komissiyası dairə seçki komissiyalarının kompyuter mütəxəssisləri üçün treninqlər keçirir
Bakı, 23 oktyabr, AZƏRTAC
Azərbaycan Respublikasının Milli Məclisinə 2015-ci il noyabrın 1-nə təyin edilmiş seçkilərlə əlaqədar genişmiqyaslı layihələr davam etdirilir.
Mərkəzi Seçki Komissiyası (MSK) Milli Məclisə seçkilərə hazırlıq məqsədilə 2015-ci il oktyabrın 22-dən etibarən dairə seçki komissiyalarının kompyuter mütəxəssisləri üçün treninqlərə başlayıb.
Bu barədə MSK Katibliyinin media və ictimai əlaqələr şöbəsindən AZƏRTAC-a məlumat verilib.
Kütləvi informasiya vasitələri tərəfindən işıqlandırılan tədbirin keçirilməsində başlıca məqsəd dairə seçki komissiyalarının kompyuter mütəxəssislərinə “Seçkilər” Dövlət Avtomatlaşdırılmış İnformasiya Sistemi, onun təkmilləşdirilmiş və yeni imkanları barədə praktiki məlumat vermək, əyani formada istifadə qaydalarını öyrətmək, həmçinin iştirakçıları maraqlandıran suallara yerindəcə aydınlıq gətirməkdir. Treninqlər çərçivəsində seçki günü məlumatların MSK-ya ötürülməsi üçün hazırlanmış proqram modullardan test rejimində istifadə edilir ki, bu da dairə seçki komissiyalarının kompyuter mütəxəssislərinə praktiki iş təcrübəsi qazanmaq və səsvermə günü “Seçkilər” Dövlət Avtomatlaşdırılmış İnformasiya Sistemindən daha rahat istifadə imkanı yaradır.
Treninqlərin 3 gün davam etməsi və oktyabrın 24-də başa çatması nəzərdə tutulur.
Bölmənin digər xəbərləri
