Milli Azərbaycan Ədəbiyyatı Muzeyində elmi sessiya: Heydər Əliyev yolunun işığı
Bakı, 10 may, Pərvanə İmanova, AZƏRTAC
Azərbaycan Milli Elmlər Akademiyasının Nizami Gəncəvi adına Milli Azərbaycan Ədəbiyyatı Muzeyində ümummilli lider Heydər Əliyevin anadan olmasının 96-cı ildönümünə həsr edilmiş “Heydər Əliyev yolunun işığı” mövzusunda elmi sessiya keçirilib. Tədbir çərçivəsində Ulu Öndərin həyat və fəaliyyəti haqqında sərgi təşkil edilib və slaydlar nümayiş olunub.
AZƏRTAC xəbər verir ki, elmi sessiyada muzeyin direktoru, akademik Rafael Hüseynov “Ulu Öndərin davam edən dərsləri” mövzusunda məruzə ilə çıxış edib, xalqımızın tarixində və taleyüklü məsələlərin həllində müstəsna rol oynamış tarixi şəxsiyyətlərin çox olduğunu söyləyib. Bildirib ki, belə tarixi şəxsiyyətlər sırasında Azərbaycan xalqının Ümummilli Lideri adını qazanmış görkəmli dövlət xadimi, dünya miqyaslı siyasətçi Heydər Əliyevin xüsusi yeri var. Görkəmli dövlət xadimi Heydər Əliyev XX əsr Azərbaycan siyasətinin parlaq siması və XXI əsr müstəqillik kursunun memarıdır. Ulu Öndər ölkəmizə rəhbərlik etdiyi sovet və müstəqillik dövründə Azərbaycanın inkişafı, çiçəklənməsi, xalqımızın rifahı naminə mühüm işlərə imza atıb.
Rafael Hüseynov ulu öndər Heydər Əliyevin zəngin siyasi fəaliyyətindən, müasir müstəqil Azərbaycan dövlətinin qurulmasında, çiçəklənməsində və inkişafında tarixi xidmətlərindən, dövlətçiliyimizin və müstəqilliyimizin qorunmasında həyata keçirdiyi böyük işlərdən söz açıb.
Diqqətə çatdırıb ki, Ulu Öndərin ölkəmizə rəhbərlik etdiyi hər iki dövrdə bir sıra mühüm obyektlər, iri fabrik və zavodlar, elm, təhsil, mədəniyyət ocaqları tikilərək istifadəyə verilib, mədəniyyət və incəsənət xadimlərinin, tarixi şəxsiyyətlərin, ədiblərimizin abidələri ucalıb, ev-muzeyləri açılıb, onların fəaliyyəti dövlət tərəfindən yüksək qiymətləndirilib.
Akademik ulu öndər Heydər Əliyevin 1969-cu ildə Azərbaycanda hakimiyyətə gəldiyi zaman respublikamızın gələcək inkişafı üçün güclü təməllər atıldığını, qısa müddətdə iqtisadi, mədəni və digər sahələrdə bir çox uğurlar əldə olunduğunu söyləyib. Qeyd edib ki, Ümummilli Liderin təşəbbüsü ilə SSRİ-də ilk məişət kondisionerləri zavodu 70-ci illərdə Bakıda tikilib, istehsal olunan məhsullar bütün ittifaq ölkələrinə göndərilib və bununla Azərbaycanın sənaye həyatında köklü dəyişiklik baş verib.
Bildirilib ki, 1993-cü ildə Azərbaycanın parçalanmaq və dağılmaq, dövlət müstəqilliyini itirmək təhlükəsi ilə üzləşdiyi zaman ulu öndər Heydər Əliyevin xalqın tələbi ilə hakimiyyətə qayıdışı və apardığı müdrik siyasət nəticəsində ölkəmiz məhvolma təhlükəsindən, vətəndaş müharibəsindən xilas edilib. Həmçinin ictimai-siyasi sabitlik bərqərar olub və bütün sahələrdə uğurlu islahatların başlanmasına zəmin yaradılıb. Ulu Öndərin Azərbaycan rəhbərliyinə qayıdışı ilə ölkənin ictimai-siyasi, sosial, iqtisadi, hərbi, elmi-mədəni həyatında, beynəlxalq əlaqələrində dönüş yaranıb, elmi əsaslara, beynəlxalq norma və prinsiplərə uyğun müstəqil dövlət quruculuğu başlanıb.
Akademik Rafael Hüseynov Ümummilli Liderin iti zəkası, müdrik və uzaqgörən siyasəti nəticəsində ölkənin gələcək iqtisadi inkişafı üçün “Əsrin müqaviləsi”nin imzalandığını, büdcə gəlirlərinin artdığını, əhalinin rifahının yüksəldiyini, ölkənin müxtəlif sahələrdə inkişafa nail olunduğunu söyləyib. O bildirib ki, ulu öndər Heydər Əliyevin siyasi kursu bu gün Prezident İlham Əliyev tərəfindən uğurla davam etdirilir. Azərbaycan sürətlə inkişaf edir, müasir dövrdə dünya ölkələri arasında özünə layiqli yer tutub və respublikamızda qazanılan bütün nailiyyətlər görkəmli dövlət xadimi Heydər Əliyevin siyasətinin bəhrəsidir.
Tədbirdə, həmçinin muzeyin komparativistika və bədii tərcümələr şöbəsinin müdiri, professor Şəfəq Əlibəylinin “Fəxr edirik: O azərbaycanlıdır”, ədəbi mərasimlər və nəşrlər şöbəsinin böyük elmi işçisi, dosent Gülzar İbrahimovanın “Heydər Əliyev - ədəbiyyatımızın, mədəniyyətimizin hamisi”, elmi inkişaf və tədris layihələri şöbəsinin elmi işçisi Tutu Məmmədovanın “Daim qəlblərdə yaşayan Ulu Öndər”, Xurşidbanu Natəvan adına Qarabağ filialının elmi işçisi Rəhman Baxşəliyevin “Ömrünü millətə və dövlətə həsr etmiş Heydər Əliyev” mövzularında məruzələri dinlənilib.
Çıxış edənlər Ulu Öndərin Azərbaycan elminin və mədəniyyətinin inkişafında mühüm xidmətlərindən, ədəbiyyat və incəsənət xadimlərinə, elm adamlarına göstərdiyi diqqət və qayğıdan söz açıblar. Bildirilib ki, keçmiş sovet dövründə və müstəqillik illərində Azərbaycanın bir sıra görkəmli ziyalıları, elm xadimləri dahi rəhbər Heydər Əliyevin himayəsi və təşəbbüsü ilə dövlət mükafatlarına və yüksək fəxri adlara layiq görülüblər. Ölkəmizin tanınmış rəssamları, heykəltəraşları, memarları, istedadlı xalça ustaları hər zaman Ulu Öndərin ən çox qiymətləndirdiyi sənətkarlar sırasında xüsusi yer tutublar.
Bölmənin digər xəbərləri
