MƏDƏNİYYƏT
Milli Kitabxanada “Zərifə Əliyeva – qaranlığa nur saçan zəka” adlı kitab sərgisi açılıb
Bakı, 26 aprel, AZƏRTAC
Aprelin 26-da Milli Kitabxanada Əməkdar elm xadimi, akademiki Zərifə Əliyevanın anadan olmasının 96-cı ildönümü münasibətilə “Zərifə Əliyeva – qaranlığa nur saçan zəka” adlı geniş kitab sərgisi açılıb.
Kitabxanadan AZƏRTAC-a bildirilib ki, sərgidə alimin Azərbaycan və xarici dillərdə olan kitabları, haqqında yazılmış əsərlər və fotoşəkillər nümayiş olunur.
Akademik Zərifə Əliyeva fədakar həkim kimi bir sıra göz xəstəliklərinin müalicəsində, o cümlədən Azərbaycanda traxomanın kökünün kəsilməsində böyük əmək sərf edib, xəstəliyin müxtəlif mərhələlərinin öyrənilməsi və müalicə metodlarının axtarılması yollarında dəyərli elmi-tədqiqatlar aparıb.
Görkəmli oftalmoloq-alim “Terapevtik oftalmologiya”, “İridodiaqnostikanın əsasları” kimi nadir elmi əsərlərin müəlliflərindən biri, 12 monoqrafiya, dərslik və dərs vəsaitinin, 150-yə yaxın elmi işin, 1 ixtira və 12 səmərələşdirici təklifin müəllifidir. Alimin zəngin elmi irsi, qazandığı nailiyyətlər, yaratdığı fundamental əsərlər Azərbaycan tibb elminin parlaq səhifəsidir.
Sərgi bir həftə davam edəcək.