MİLLİ MƏCLİSİN NÖVBƏDƏNKƏNAR İCLASINDA
Milli Məclisin iyunun 20-də keçirilən növbədənkənar iclasında təşkilati məsələyə baxılmış, deputat Əli Məhəmməd oğlu Hüseynov Hüquq siyasəti və dövlət quruculuğu məsələləri daimi komissiyasının sədri seçilmişdir. İxtisasca hüquqşünas olan Əli Hüseynov iki ildən artıq idi ki, həmin komissiyanın sədr müavini idi.
Milli Məclis Azərbaycan Prezidenti Heydər Əliyevin təqdimatına əsasən, Fərhad Sahib oğlu Abdullayevi Konstitusiya Məhkəməsinin hakimi təyin etmişdir.
Sonra Milli Məclis sədrinin müavini Ziyafət Əsgərov 2003-cü il fevralın 27-də Bakı şəhərində imzalanmış “Azərbaycan Respublikası Hökuməti ilə Rusiya Federasiyası Hökuməti arasında hərbi-texniki əməkdaşlıq haqqında” saziş barədə məlumat vermişdir. Parlament sazişi ratifikasiya etmişdir. Sonra Sosial siyasət məsələləri daimi komissiyasının sədri Hadi Rəcəblinin Azərbaycanın Avropa Şurasının “Antidopinq Konvensiyası”na qoşulması barədə məlumatı dinlənilmişdir. Deputatlar respublikamızın həmin sənədə qoşulmasına razılıq vermişlər.
Aqrar siyasət daimi komissiyasının sədri Eldar İbrahimov “Torpaq Məcəlləsi”nə, hüquq siyasəti və dövlət quruculuğu məsələləri daimi komissiyasının üzvü Cahangir Hüseynov “Məhkəmə qəraralarının icrası haqqında”, “Məhkəmələr və hakimlər haqqında” qanunlara, eləcə də digər qanunvericilik aktlarına dəyişikliklər və əlavələr edilməsi barədə və “Azərbaycan Respublikasının Seçki Məcəlləsinin pozulmasına görə məsuliyyət haqqında” qanun layihəsi barədə məlumat vermişlər.
Milli Məclis təklif olunan dəyişiklikləri və əlavələri, “Seçki Məcəlləsinin pozulmasına görə məsuliyyət haqqında” Qanunda layihəsini qəbul etmişdir.
Bölmənin digər xəbərləri
