Bakı, 6 oktyabr, AZƏRTAC

Oktyabrın 6-da Milli Məclisin növbəti plenar iclası keçirilib.

AZƏRTAC xəbər verir ki, Milli Məclisin sədri Oqtay Əsədov iclası açdıqdan sonra gündəlik təsdiq olunub.

Sonra gündəlikdə duran məsələlərin müzakirəsinə başlanılıb.

İclasda "Azərbaycan Respublikası Hökuməti ilə Səudiyyə Ərəbistanı Krallığı Hökuməti arasında hava əlaqəsi haqqında", “Azərbaycan Respublikası Hökuməti ilə Kanada Hökuməti arasında diplomatik missiyalar və konsulluq nümayəndəlikləri əməkdaşlarının ailə üzvlərinin əmək fəaliyyəti haqqında” Azərbaycan Respublikasının Xarici İşlər Nazirliyi ilə Kanadanın Xarici İşlər və Beynəlxalq Ticarət Departamenti arasında notalar mübadiləsi formasında sazişlərin təsdiq edilməsi barədə qanun layihələri qəbul edilib. Həmçinin "Azərbaycan Respublikasında dövlət daktiloskopik qeydiyyatı haqqında" Qanunda dəyişiklik edilməsi barədə qanun layihəsinə baxılıb. Bildirilib ki, Qanunun 8-ci maddəsinə təklif olunan dəyişikliyə görə, müvafiq qanunvericiliyə uyğun olaraq, Azərbaycan Respublikasının hüdudlarından kənara çıxarılmalı olan, habelə qanunsuz miqrantların saxlanılması mərkəzlərində saxlanılan əcnəbilər və vətəndaşlığı olmayan şəxslərin məcburi daktiloskopik qeydiyyata alınması nəzərdə tutulur. Qeyd edək ki, qanunun hazırkı maddəsində qanunsuz miqrantların saxlanılması mərkəzlərində saxlanılan əcnəbilər və vətəndaşlığı olmayan şəxslərin məcburi daktiloskopik qeydiyyata alınması nəzərdə tutulmur.

Qanun layihəsi səsə qoyularaq qəbul edilib.

Milli Məclis "Qaçqınlar və məcburi köçkünlərin (ölkə daxilində köçürülmüş şəxslərin) statusu haqqında" Qanunda, İnzibati Xətalar, Cəzaların İcrası, Cinayət, Cinayət-Prosessual məcəllələrində dəyişikliklər edilməsi haqqında qanun layihələrini də təsdiqləyib. "Azərbaycan Respublikasının İnsan hüquqları üzrə müvəkkili (ombudsman) haqqında" Azərbaycan Respublikasının Konstitusiya Qanununda dəyişikliklər edilməsi barədə qanun layihəsi müzakirə edilərək qəbul olunub. Bildirilib ki, dəyişikliklərə əsasən Ombudsman Aparatında Milli Preventiv Qrup istənilən vaxt, maneəsiz və əvvəlcədən xəbərdarlıq etmədən qanunsuz miqrantların saxlanılması mərkəzlərinə daxil ola biləcək, miqrantlarla görüş keçirəcək, onların saxlanma şəraiti ilə tanış olacaq, həyata keçirdiyi tədbirlərin gedişi və nəticələrini protokollaşdıracaq.

Deputatlar, həmçinin "Dini etiqad azadlığı haqqında" Qanunda dəyişikliklər edilməsi barədə qanun layihəsini müzakirə ediblər. Qanunun 29-cu maddəsində aşağıdakı dəyişikliklər edilib. Yeddinci abzasa "məlumatlar" sözündən sonra ", o cümlədən dini fəaliyyətə dair və maliyyə hesabatları" sözləri əlavə olunub. On birinci abzasın sonunda nöqtə işarəsi nöqtəli vergül işarəsi ilə əvəz edilib və maddəyə aşağıdakı məzmunda on ikinci və on üçüncü abzaslar əlavə edilib: “nəzarət markası ilə markalanmış dini təyinatlı ədəbiyyatın (kağız və elektron daşıyıcılarında), audio və video materialların, mal və məmulatların və dini məzmunlu başqa məlumat materiallarının satışı üzrə ixtisaslaşdırılmış satış məntəqələrində "Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında" Azərbaycan Respublikasının Qanununa uyğun olaraq yoxlamalar aparır; din sahəsində mütəxəssislərin hazırlanması və ixtisaslarının artırılması üçün tədbirlər görür, ixtisasartırma kurslarını təşkil edir".

Dəyişikliklər səsə qoyularaq qəbul edilib.

Sonra iclasda “Kütləvi informasiya vasitələri haqqında” Qanunda dəyişiklik edilməsi barədə qanun layihəsinə baxılıb. Bildirilib ki, Qanunun 14-cü maddəsinə aşağıdakı məzmunda üçüncü hissə əlavə edilib: “Dini mətbu nəşrlərin təsis edilməsi ilə bağlı müvafiq icra hakimiyyəti orqanının rəyi sənədlərə əlavə olunur”. Dəyişiklik dini mətbu nəşrlərin təsis edilməsi ilə bağlı müvafiq icra hakimiyyəti orqanının rəyinin alınmasını nəzərdə tutur.

Layihə səsə qoyularaq qəbul edilib.

"Hüquqi şəxslərin dövlət qeydiyyatı və dövlət reyestri haqqında" Qanunda dəyişikliklər edilməsi barədə qanun layihəsinə baxılan zaman bildirilib ki, qanunun 5.4.8-ci maddəsinin sonunda nöqtə işarəsi nöqtəli vergül işarəsi ilə əvəz edilib və aşağıdakı məzmunda 5.4.9-cu maddə əlavə olunub: "5.4.9. nizamnaməsində dini dəyərlərin təbliği ilə bağlı fəaliyyət istiqamətləri olan qeyri-kommersiya hüquqi şəxslərin dövlət qeydiyyatına alınması üçün müvafiq icra hakimiyyəti orqanının rəyi".

Qanun layihəsi səsə qoyularaq təsdiq edilib.

İclasda, həmçinin "Müflisləşmə və iflas haqqında", “İnvestisiya fondları haqqında", "Banklar haqqında", "Sığorta fəaliyyəti haqqında" Qanunlarda dəyişikliklər edilməsi barədə qanun layihələrinə baxılıb. Qanunlara edilən dəyişikliklə müddət konkretləşməsi aparılıb.

“Müflisləşmə və iflas haqqında” qanun layihəsinə edilən dəyişikliklə səhmdar investisiya fondu və sığortaçı bu qanunla yanaşı, müvafiq olaraq “İnvestisiya fondları haqqında” və “Sığorta fəaliyyəti haqqında” qanunun tələbləri nəzərə alınaraq müflis elan ediləcək. Bu qanunun bütün kommersiya təşkilatlarına (banklar istisna olmaqla) və qeyri-kommersiya təşkilatlarına şamil edilməsi nəzərdə tutulur. Eyni zamanda, qanunda bu qanunun Mərkəzi Banka şamil edilməməsi maddəsi saxlanılıb.

Müzakirələrdən sonra qanun layihələri səsə qoyularaq qəbul edilib.

İclasda “Təhsil haqqında” Qanuna magistratura ilə bağlı dəyişiklik də edilib. Qüvvədə olan qanuna əsasən, indiyə qədər magistratura pilləsi elmi-pedaqoji kadr potensialı, maddi-texniki bazası və təhsil infrastrukturu kifayət qədər yüksək olan ali təhsil müəssisələrində yaradılıb. Dəyişikliyə əsasən isə bundan sonra magistratura elmi-pedaqoji kadr potensialı, maddi-texniki bazası və təhsil infrastrukturu kifayət qədər yüksək olan ali təhsil müəssisələri ilə yanaşı, müvafiq icra hakimiyyəti orqanının müəyyən etdiyi elmi təşkilatda da yaradıla bilər. Dəyişiklik elm və təhsil sahəsində inteqrasiyanı təmin etmək məqsədilə edilib.

Qanun layihəsi səsverməyə çıxarılaraq qəbul olunub.

"Kiçik sahibkarlığa dövlət köməyi haqqında", "Uyğunluğun qiymətləndirilməsi sahəsində akkreditasiya haqqında", "Narkoloji xidmət və nəzarət haqqında", "Narkotik vasitələrin, psixotrop maddələrin və onların prekursorlarının dövriyyəsi haqqında" qanunlarda dəyişikliklər edilməsi barədə qanun layihələrinə baxılıb və müzakirələrdən sonra səsə qoyularaq təsdiqlənib.

"Azərbaycan Respublikasının "Tərəqqi" medalının Əsasnaməsinin və təsvirinin təsdiq edilməsi haqqında" Azərbaycan Respublikasının 1993-cü il 6 dekabr tarixli 758 nömrəli Qanununda dəyişiklik edilməsi barədə qanun layihəsi də müzakirə edilib. Bildirilib ki, Azərbaycan Respublikasının 1993-cü il 6 dekabr tarixli 758 nömrəli Qanunu ilə təsdiq edilmiş “Azərbaycan Respublikasının “Tərəqqi” medalının Əsasnaməsi”nin 1-ci maddəsində “xalq təhsili” sözləri “hüquq, təhsil” sözləri ilə əvəz edilib. Təklif olunan dəyişikliyin məqsədi qanunvericiliyin təkmilləşdirilməsidir.

Layihə səsə qoyularaq qəbul edilib.

"Yol hərəkəti haqqında" Qanunda dəyişikliklər edilməsi barədə qanun layihəsi müzakirəyə çıxarılan zaman qeyd edilib ki, dəyişikliklər “Azərbaycan Respublikasının İnzibati Xətalar Məcəlləsində dəyişikliklər edilməsi haqqında” Azərbaycan Respublikasının 2015-ci il 24 fevral tarixli 1215-IVQD nömrəli Qanununun tətbiqi ilə əlaqədar edilib.

Müzakirələrdən sonra layihə səsə qoyularaq qəbul edilib.

"Polis haqqında" Qanunda dəyişiklik edilməsi barədə qanun layihəsinə baxılıb. Qanunun 14-cü maddəsinə aşağıdakı məzmunda 7-1-ci bənd əlavə edilib: "7-1) kütləvi idman tədbirlərinin və idman yarışlarının keçirilməsi zamanı idman obyektlərində, tamaşaçılar üçün nəzərdə tutulmuş yerlərdə, eləcə də idman obyektlərinə bitişik ərazilərdə və təxliyyə yollarında zorakılığın qarşısını almaq, yarış iştirakçılarının və tamaşaçıların təhlükəsizliyini və ictimai asayişi təmin etmək;". Bildirilib ki, dəyişikliklər “Bədən tərbiyəsi və idman haqqında” Qanunda dəyişikliklər edilməsi barədə” Azərbaycan Respublikasının 2015-ci il 28 aprel tarixli 1271-IVQD nömrəli Qanununa uyğunlaşdırmaq məqsədilə edilir.

Qanun layihəsi səsə qoyularaq qəbul olunub.

Daha sonra "Özəl tibb fəaliyyəti haqqında" Qanunda dəyişikliklərə baxılıb. Qeyd edilib ki, Qanunun 4-cü maddəsinə edilən əlavəyə görə, “tibb fəaliyyəti ilə məşğul olan şəxslər tərəfindən özəl tibb fəaliyyəti sahəsində onlara verilmiş xüsusi razılıqda (lisenziyada) göstərilən işlər və xidmətlərdən kənar (ilkin tibbi yardım istisna olmaqla) tibb fəaliyyətinin həyata keçirilməsinə yol verilmir”. Qanunun 16-cı maddəsinə əlavə edilən bəndə görə, özəl tibb müəssisəsində vətəndaş üçün zəruri olan ixtisaslaşdırılmış tibbi yardımın göstərilməsi mümkün olmadıqda, müəssisənin müalicə həkimi tərəfindən həmin şəxs bu yardımı göstərən dövlət tibb müəssisəsinə və ya şəxsin istəyinə uyğun olaraq digər özəl tibb müəssisəsinə göndərilməlidir.

Dəyişiklik səsə qoyularaq qəbul edilib.

Bundan başqa, iclasda "Tarix və mədəniyyət abidələrinin qorunması haqqında", "Milli arxiv fondu haqqında", "İctimai televiziya və radio yayımı haqqında", "Mədəniyyət haqqında" qanunlarda dəyişikliklər edilməsi barədə qanun layihələrinə də baxılıb və səsə qoyularaq qəbul edilib.

Bununla da plenar iclas başa çatıb.