Milli Məclisin nümayəndə heyəti Paraqvayda səmərəli görüşlər keçirib
Bakı, 9 mart, AZƏRTAC
Milli Məclisin deputatları Cavanşir Feyziyev, Asim Mollazadə, Fuad Muradov və Aslan Cəfərov Paraqvayda səfərdə olublar.
Xarici İşlər Nazirliyinin mətbuat xidmətindən AZƏRTAC-a bildiriblər ki, səfər çərçivəsində Azərbaycan nümayəndə heyəti Paraqvay Milli Konqresinin yuxarı palatasında Senatın sədrinin əvəzləyicisi qismində sədrin birinci müavini Enrique Bacchetta, xarici əlaqələr və beynəlxalq məsələlər daimi komissiyasının sədri Miguel Saguier, habelə Senatda Azərbaycan ilə parlamentlərarası dostluq qrupunun üzvləri ilə görüşüb. Milli Məclisin deputatları Paraqvay Deputatlar Palatasının sədri Huqo Velazquez və həmin palatanın beynəlxalq əlaqələr komissiyasının sədri Jose Maria İbanez ilə də görüşüblər.
Sonra Paraqvay Milli Konqresinin binasında Azərbaycan nümayəndə heyətinin şərəfinə ziyafət verilib.
Görüşlərdə Azərbaycan və Paraqvay parlamentləri arasında əməkdaşlığın siyasi, iqtisadi və humanitar sahələrdə əlaqələrin inkişafına töhfə verəcəyi vurğulanıb. Enerji və kənd təsərrüfatı əməkdaşlığın prioritet sahələri kimi qiymətləndirilib. Müvafiq sahələrdə qanunvericilik üzrə təcrübə mübadiləsinin əhəmiyyəti qeyd edilib. Xüsusilə də hər iki ölkənin açıq dənizə birbaşa çıxışının olmadığını nəzərə alaraq, Paraqvay Azərbaycanın beynəlxalq bazarlara çıxışını təmin edən infrastruktur layihələrini, eyni zamanda, neft və qaz sektorunda əldə etdiyi nailiyyətləri yüksək qiymətləndirib və bu baxımdan ölkəmizin təcrübəsinin öyrənilməsinə maraq göstərib.
Müzakirələrdə, həmçinin parlamentlərarası əlaqələrin genişləndirilməsi, həmçinin beynəlxalq və regional məsələlər də diqqət mərkəzində olub. Azərbaycanlı parlamentarilər ölkəmizin inkişaf strategiyası, xarici siyasətinin əsas istiqamətləri, Ermənistanın Azərbaycana qarşı təcavüzü, münaqişənin həllinin regiona gətirəcəyi fayda, ölkəmizdə iqtisadiyyatın şaxələndirilməsi, təhsil, gənclər, idman sahələrində görülən işlər, həmçinin Azərbaycanın mədəniyyətlərarası dialoqda oynadığı rol barədə məlumat veriblər.
Səfər çərçivəsində Azərbaycan nümayəndə heyətinin Paraqvay hökumətinin üzvləri ilə də görüşləri olub. Paraqvayın xarici işlər nazirinin əvəzləyicisi qismində nazir müavini Rigoberto Gauto ilə keçirilmiş görüşdə iki ölkə arasında siyasi, iqtisadi, humanitar, təhsil sahələrində əməkdaşlıq, müvafiq hüquqi-normativ bazanın inkişafı ilə bağlı fikir mübadiləsi aparılıb. Görüşdə beynəlxalq və regional məsələlər də diqqət mərkəzində olub. Deputatlarımız ölkəmizin xarici siyasəti, Ermənistanın Azərbaycana hərbi təcavüzü və münaqişənin regiondakı vəziyyətə təsiri barədə məlumat veriblər.
Bu ölkənin mədən və enerji nazirinin müavini Mauricio Bejarano, kənd təsərrüfatı və heyvandarlıq nazirinin müavini Markos Medina ilə görüşlərdə Paraqvay tərəfi Azərbaycanın neft və qaz, Azərbaycan tərəfi isə Paraqvayın kənd təsərrüfatı sahələrində əldə etdiyi nailiyyətləri yüksək qiymətləndirib. Tərəflər bu sahələr üzrə qarşılıqlı əməkdaşlıq imkanları barədə fikir mübadiləsi aparıblar.
Səfər çərçivəsində Azərbaycan nümayəndə heyətinin Paraqvayın işgüzar dairələri, o cümlədən SENACSA, ARP, FECOPROD, APROLE, Frutika kimi istehsal assosiasiyaları və şirkətlərinin rəhbərləri ilə görüşlərində iqtisadi, ticarət və sərmayə sahələrində əməkdaşlıq imkanları müzakirə edilib.
Milli Məclisin nümayəndə heyətinin Paraqvaya səfəri bu ölkənin, eləcə də Latın Amerikasının aparıcı KİV-lərinin diqqət mərkəzində olub.
Mətbuatda səfərlə bağlı yazılar, Azərbaycan parlamentarilərinin, həmçinin səfir Məmməd Əhmədzadənin müsahibələri dərc edilib. Yazılarda və müsahibələrdə Azərbaycan-Paraqvay münasibətləri, ölkəmizin son illərdə əldə etdiyi nailiyyətlər və regionda lider dövlətə çevrilməsi, Ermənistan-Azərbaycan, Dağlıq Qarabağ münaqişəsi və s. mövzulardan bəhs edilib.
Azərbaycan ilə Paraqvay arasında diplomatik münasibətlər 2004-cü ildə qurulub. 2012-ci ildə Azərbaycanın iqamətgahı Buenos-Ayresdə olmaqla səfiri Məmməd Əhmədzadə eyni zamanda Paraqvaya da akkreditə olunub. 2014-cü ildə Paraqvay Milli Konqresinin Senatında tərkibində müxtəlif siyasi partiyaların təmsilçiləri olan 7 senatordan ibarət parlamentlərarası dostluq qrupu yaradılıb.
Bölmənin digər xəbərləri
