Hörmətli İcraiyyə Komitəsinin üzvləri!

Əziz idmançılar!

Əvvəlki illərdə olduğu kimi, 2005-ci il də Azərbaycan Milli Olimpiya Komitəsi üçün uğurlu olmuşdur. İl ərzində Milli Olimpiya Komitəsi Azərbaycanda idmanın və Olimpiya hərəkatının inkişafı və təbliği sahəsində fəaliyyətini davam etdirmiş, bir sıra nailiyyətlər əldə etmişdir.

Bildiyiniz kimi, 1997-ci ildə Milli Olimpiya Komitəsinin prezidenti kimi keçirdiyi ilk iclasda cənab İlham Əliyev Milli Olimpiya Komitəsinin fəaliyyət istiqamətini, qarşıya qoyulan məqsəd və vəzifələri müəyyən etmişdir. Bu çoxşaxəli proqram Azərbaycan idmançılarının beynəlxalq yarışlarda uğurlu çıxışlarını təmin etməklə yanaşı, ölkəmizdə yüksək səviyyəli beynəlxalq yarışların keçirilməsinə, idmançılarımızın sosial vəziyyətinin yaxşılaşdırılmasına, idmanın maddi-texniki bazasının möhkəmləndirilməsinə, respublikamızda Olimpiya hərəkatının geniş təbliği ilə bərabər, Beynəlxalq Olimpiya hərəkatında Azərbaycanın nüfuzunun yüksəldilməsinə yönəldilmişdir. Bütün bu istiqamətlərdə cari ildə yüksək nəticələr əldə olunmuşdur.

Azərbaycan idmançıları istər ölkədə, istərsə də onun hüdudlarından kənarda keçirilmiş mötəbər yarışlarda uğurla çıxış etmişlər. İl ərzində 59 dünya çempionatı, kubok və birincilik yarışlarında 332 nəfər, 83 Avropa çempionatı, kubok və birincilik yarışlarında 788 nəfər, 96 beynəlxalq yarışda 934 idmançının iştirakı təmin edilmişdir.

Möhtərəm cənab Prezidentin söylədiyi kimi, 2005-ci ildə Azərbaycan idmançıları beynəlxalq rəsmi yarışlarda 211 medal qazanmışlar. Çox fərəhli haldır ki, bu medalların 121-i təkcə olimpiya idman növləri üzrədir. Olimpiya idman növləri üzrə 33 qızıl, 29 gümüş və 59 bürünc medal əldə edilmişdir. Biz əvvəllər medalların sayında qeyri-olimpiya idman növlərinin daha üstünlük təşkil etdiyini müşahidə edirdiksə, son ildə, 2005-ci ildə olimpiya idman növlərində medalların sayı daha çox olmuşdur və bu, Milli Olimpiya Komitəsi kimi bizi çox sevindirir. Bu nəticələr arasında Nizami Paşayevin ikinci dəfə dünya çempionu, Elçin İsmayılovun, Niyaməddin Paşayevin, Vitali Rəhimovun Avropa çempionu, Elçin Əlizadə, Ramal Amanovun dünyada ikinci olmaları xüsusi qeyd edilməlidir.

2005-ci ildə komanda idman oyunlarında da uğurlarımız az deyildir. Voleybolçu qızlarımız dünya çempionatının final mərhələsinə vəsiqə qazanmış, Avropa çempionatında dördüncü yeri tutmuş, Dünya “Qran-Pri” yarışlarının Avropa təsnifat turnirinin qalibi olmuşlar. Otüstü xokkeyçilərimiz Avropa milli komandalarının Bakıda keçirilmiş “Trofi” yarışında qələbə qazanaraq, Avropa çempionatının final mərhələsinə vəsiqə qazanmışlar.

MDB respublikalarında futbol üzrə çempion komandalar arasında Moskvada keçirilmiş “Birlik” kuboku yarışlarında “Neftçi” ikinci yeri tutmuşdur. Bildiyiniz kimi, bu yarışlarda futbolçularımız Ermənistan komandasına qalib gəlmişdilər.

Bu il bilavasitə Beynəlxalq Olimpiya Komitəsinin himayəsi altında keçirilmiş idman tədbirlərində də Azərbaycan layiqincə təmsil olunmuşdur. Belə tədbirlərdən biri İtaliyanın Liqnano şəhərində keçirilmiş Avropa yeniyetmələrinin növbəti Olimpiya Festivalı olmuşdur. Azərbaycanın yeniyetmə idmançıları bu yarışlarda ilk dəfə 6 medal - 2 qızıl və 4 bürünc medal qazanaraq, Avropa ölkələri arasında 15-ci yeri tutmuşlar.

Digər tədbir isə 2005-ci ildə Səudiyyə Ərəbistanında keçirilmiş I İslam Həmrəyliyi Oyunları olmuşdur. 54 ölkənin iştirak etdiyi bu oyunlarda idmançılarımız 15 medal (4 qızıl, 4 gümüş, 7 bürünc) qazanaraq, 8-ci yeri tutmuşlar. Mən bir məsələni xüsusilə qeyd etmək istəyirəm ki, Azərbaycanın yığma komandası bu oyunlara gedərkən xüsusi hazırlıq keçməmişdi və bir çox növlərdə biz hətta əsas heyəti apara bilmədik. İkinci heyətlə iştirak etməsinə baxmayaraq, bu oyunlarda Azərbaycan yığma komandası 15 medal qazandı və ümumi hesabda səkkizinci yerə çıxdı.

Cari ildə Azərbaycanda beynəlxalq idman yarışlarının təşkili və keçirilməsi sahəsində böyük nailiyyətlər qazanılmışdır. Ümumilikdə ölkədə 22 beynəlxalq yarış təşkil olunmuşdur.

Əlbəttə, cənab Prezident, Siz qeyd etdiyiniz kimi, bu yarışlar arasında ən böyüyü, mötəbəri Azərbaycanda bədii gimnastika üzrə XXVII dünya çempionatı olmuşdur. Bu dünya çempionatı bütün beynəlxalq Olimpiya hərəkatına bir daha sübut etmişdir ki, Azərbaycan ən yüksək səviyyəli turnirləri, yarışları təşkil etməyə qadirdir və onları ən yüksək səviyyədə keçirir. Eyni sözləri bədii gimnastika üzrə Dünya kubokunun mərhələ yarışına da aid edə bilərik. Bu yarış da çox yüksək səviyyədə keçirilmişdir. Bu il Azərbaycanda taekvondo üzrə gənclər arasında Avropa çempionatı, MDB-nin üzvü olan ölkələrin V Beynəlxalq İdman Oyunları, ümummilli liderimiz Heydər Əliyevin xatirəsinə həsr olunmuş beynəlxalq boks turniri çox yüksək səviyyədə keçirilmişdir. Eləcə də cənab Prezidentin qeyd etdiyi kimi, “Qran-pri” üzrə yarışlar əyalət şəhərində - Qubada yüksək müvəffəqiyyətlə keçirilmişdir.

Cari ildə Azərbaycan Milli Olimpiya Komitəsi müxtəlif ölkələrin olimpiya komitələri ilə münasibətlərini daha da möhkəmləndirmişdir. Belə ki, fevral ayında İtaliya Olimpiya Komitəsi, may ayında Çin Xalq Respublikasının Olimpiya Komitəsi, noyabrda isə Gürcüstan Milli Olimpiya Komitəsi ilə əməkdaşlıq müqavilələri bağlanmışdır.

İl ərzində Azərbaycan Respublikasının Prezidenti, Azərbaycan Milli Olimpiya Komitəsinin prezidenti beynəlxalq idman qurumlarının rəhbərlərini, o cümlədən Beynəlxalq Hərbi İdman Şurasının prezidenti, briqada generalı Cianni Qolanı, Beynəlxalq Güləş Federasiyaları Assosiasiyasının (FİLA) prezidenti Rafael Martinettini, MDB-nin üzvü olan ölkələrin V Beynəlxalq İdman Oyunlarının baş hakimi, iki dəfə Sovet İttifaqı Qəhrəmanı, təyyarəçi-kosmonavt Aleksey Leonovu, Beynəlxalq Olimpiya hərəkatının tanınmış xadimi Vitali Smirnovu, Beynəlxalq Gimnastika Federasiyasının prezidenti Bruno Qrandini qəbul etmiş, onlarla görüşlər keçirmişdir.

Azərbaycan Respublikasının Prezidenti İlham Əliyevin Azərbaycan idmançıları, onların məşqçiləri və milli idman federasiyaları rəhbərləri, idman mütəxəssisləri ilə də bir sıra görüşləri olmuşdur. Bu görüşlərdə idmançılar, habelə idman mütəxəssisləri mükafatlandırılmışdır.

Möhtərəm cənab Prezidentin qeyd etdiyi kimi, 2005-ci ildə Azərbaycan Milli Olimpiya Komitəsi tikinti-quruculuq işlərini də davam etdirmişdir. Bu il Şamaxı Olimpiya İdman Kompleksi istifadəyə verilmiş və yeni olimpiya idman komplekslərinin təməli qoyulmuşdur. 1997-ci ildən başlayaraq, hər il həyata keçirdiyimiz tədbir bu il də davam etdirilmişdir. Bu da Azərbaycanın ən güclü idmançılarına, onların məşqçilərinə təqaüdlərin verilməsi olmuşdur. 2005-ci ildə Milli Olimpiya Komitəsi 48 idmançıya və onların məşqçilərinə, eləcə də 7 idman veteranına təqaüdlər vermişdir.

Milli Olimpiya Komitəsi idman və incəsənət sahəsində də bir sıra işlər görmüşdür. 2005-ci il iyulun 11-də Miniatür Kitab Muzeyində Milli Olimpiya Komitəsinin və Respublika “Kitab” Cəmiyyətinin nəşr etdirdiyi “Olimpiya Oyunları-2004” miniatür kitabının təqdimat mərasimi olmuşdur. Mərasimdə YUNESKO-nun xoşməramlı səfiri, Milli Mədəni Olimpiada Komitəsinin prezidenti, Milli Olimpiya Komitəsi İcraiyyə Komitəsinin üzvü Mehriban xanım Əliyeva iştirak etmiş və nitq söyləmişdir. Bu gün siz bu tədbirə gələndə foyedə yeni bir sərgi-müsabiqənin keçirildiyinin şahidi oldunuz. Bu tədbir Beynəlxalq Olimpiya Komitəsinin xətti ilə təşkil edilmişdir. “Olimpiya, incəsənət və idman-2005” adı altında təşkil olunmuş sərgi-müsabiqəyə iki gündən sonra yekun vurulacaq və qaliblər mükafatlandırılacaqlar.

Cənab İlham Əliyev təkcə Milli Olimpiya Komitəsinin prezidenti kimi deyil, habelə ölkə rəhbəri kimi də daim idmana böyük qayğı göstərir. Azərbaycan Respublikasının Prezidenti İlham Əliyev 2005-ci il 4 mart tarixli Fərmanı ilə “Əməkdar bədən tərbiyəsi və idman xadimi” fəxri adını təsis etmiş, “Bədən tərbiyəsi və idman günü”nün təsis edilməsi haqqında Sərəncam imzalamışdır. Azərbaycan Prezidentinin 10 oktyabr tarixli Sərəncamı ilə Azərbaycan Respublikasında 2005-2015-ci illərdə futbolun inkişafına dair Dövlət Proqramı təsdiq edilmişdir. Sadaladığım bütün bu işlər bir ildə - 2005-ci ildə görülmüşdür.

Qarşıdan gələn 2006-cı ildə daha çox işlər görülməlidir. Fevral ayında Azərbaycan üçüncü dəfə Qış Olimpiya Oyunlarında iştirak edəcəkdir. Gələn il bəzi idman növləri üzrə Pekin Olimpiadasına təsnifat yarışları başlanacaqdır. Ümumiyyətlə, 2006-cı il Pekinə hazırlıq dövrünün ən məsul mərhələlərindən biri olacaqdır. Əminəm ki, Milli Olimpiya Komitəsi öz prezidenti və dövlətimizin başçısı möhtərəm cənab İlham Əliyevin rəhbərliyi altında Gənclər, İdman və Turizm Nazirliyi, milli federasiyalar, bütün idman təşkilatları ilə birlikdə qarşıya qoyduğu vəzifələri bundan sonra da layiqincə yerinə yetirəcəkdir. Mən hesab edirəm ki, 2005-ci il Azərbaycanda olimpiya hərəkatının inkişafının yeni mərhələsi olmuşdur və ölkəmizdə idmanın, Olimpiya hərəkatının yüksəlişi bundan sonra da davam edəcəkdir.

X X X

İLHAM ƏLİYEV: Gözəl ənənə olaraq, eyni zamanda, biz yüksək nəticələr göstərmiş idmançıları mükafatlandırırıq. Bu gün Milli Olimpiya Komitəsi tərəfindən onlara pul mükafatları veriləcəkdir. Eyni zamanda Azərbaycanda idmanın inkişafında böyük rolu olmuş idmançıların, məşqçilərin, idman mütəxəssislərinin xidmətini nəzərə alaraq, biz onları yeni mənzillərlə mükafatlandıracağıq. Bu da bir növ ənənədir, hər ilin sonunda biz görüşürük, həm ilin yekunları haqqında müzakirələr aparırıq, eyni zamanda idmançılarımızı, idman mütəxəssislərimizi mükafatlandırırıq. Mən bu gün də istəyirəm yeni mənzillərin orderlərini sizə təqdim edim.

X X X

Azərbaycan Prezidenti, Milli Olimpiya Komitəsinin prezidenti İLHAM ƏLİYEV boks üzrə dünya çempionatının gümüş mükafatçısı Elçin Əlizadəyə, boks üzrə dünya çempionatının gümüş mükafatçısı Ramal Amanova, cüdo üzrə yığma komandanın məşqçisi Əli Dərvişova, atletika üzrə Afina paralimpiya oyunlarının çempionu Oleq Panyutinə, şahmat üzrə Azərbaycan yığma komandasının baş məşqçisi Fikrət Sideyifzadəyə, voleybol üzrə yığma komandanın üzvləri Natalya Məmmədovaya, Yelena və Oksana Parxomenko bacılarına, Oksana Məmmədyarovaya, karate-do üzrə veteranlar arasında dünya çempionu Hidayət Şabanova, voleybol üzrə yığma komandanın məşqçisi Aleksandr Çervyakova, basketbol üzrə yığma komandanın üzvü Aleksandr Rındinə, yunan-Roma güləşi üzrə Avropa çempionu Vitali Rəhimova, veteran futbolçu Elbrus Abbasova, sambo üzrə yığma komandanın baş məşqçisi Mübariz İbrahimova, akrobatika üzrə yığma komandanın məşqçisi Aydın Abbasova, ağır atletika üzrə Azərbaycanın əməkdar məşqçisi Vahid Nəzərova, taekvondo üzrə dünya və Avropa çempionatının mükafatçısı Təvəkkül Bayramova, alpinizm üzrə məşqçi-müəllim Saridan Mursaqulova, cüdo üzrə dünya çempionatının bürünc mükafatçısı Rəsul Səlimova, kikboksinq üzrə veteranlar arasında dünya çempionu Azər Həsənsoya, yunan-Roma güləşi üzrə respublikanın əməkdar məşqçisi Hüseynağa Ələsgərova və boks üzrə Sidney və Afina Olimpiya oyunlarında 5-ci yeri tutan Ruslan Xairova yeni mənzillərin orderlərini təqdim etdi.

Dövlətimizin başçısı onlara bir daha müraciət edərək dedi:

- Əziz dostlar, sizin hamınızı bir daha ürəkdən təbrik edirəm. Qarşıdan gələn Dünya azərbaycanlılarının həmrəyliyi günü və Yeni il münasibətilə təbrik edirəm. Sizə cansağlığı, uğurlar arzulayıram.

X X X

2005-ci ildə Olimpiya idman növləri üzrə dünya, Avropa çempionatı və birinciliklərində, kubok yarışlarında fərqlənən idmançılara, onların şəxsi məşqçilərinə və baş məşqçilərə pul mükafatları da təqdim olundu.