Milyarderlərin sərvəti tarixi maksimuma - 18,3 trilyon dollara çatıb
Bakı, 19 yanvar, AZƏRTAC
Dünya üzrə milyarderlərin ümumi sərvəti 2025-ci ildə tarixi maksimuma çatıb.
AZƏRTAC xəbər verir ki, beynəlxalq “Oxfam” təşkilatının hesabatına görə, hazırda qlobal milyarderlərin sərvəti tarixdə ən yüksək səviyyəyə qalxaraq 18,3 trilyon dollar təşkil edir. 2025-ci ildə bu sərvət son beş ildəki orta göstəricidən üç dəfə sürətlə - 16 faizdən çox artıb. Ümumilikdə 2020-ci ildən bəri milyarderlərin sərvətində 81 faiz artım baş verib.
Ekspertlər hesablayıblar ki, dünya üzrə milyarderlərin sayı da artaraq ilk dəfə 3000 nəfəri ötüb. Onların ümumi sərvəti ötən il 2,5 trilyon dollar artıb. Bu məbləğ "ifrat yoxsulluğu 26 dəfə aradan qaldırmaq" üçün kifayət edər.
Digər tərəfdən, milyarderlərin mühüm siyasi vəzifələri tutma ehtimalı adi vətəndaşlara nisbətən 4000 dəfə çoxdur.
“Əksəriyyət milyarderlərin hakim mövqe tutduğu bir dünya istəmir. Etirazların artması göstərir ki, insanlar azlığın lehinə manipulyasiya olunan sistemi rədd edirlər”, - deyə təşkilatın nümayəndəsi Sonya Saltan vurğulayıb.
Bölmənin digər xəbərləri
