Minimum aylıq əməkhaqqı və pensiyaların artımı əhalinin sosial təminatına müsbət töhfə verəcək RƏY
Bakı, 26 sentyabr, AZƏRTAC
Sentyabrın 23-də yeddinci çağırış Azərbaycan Respublikası Milli Məclisinin ilk iclasında iştirak edən Prezident İlham Əliyev bu il keçirilmiş prezident və parlament seçkilərinin mahiyyəti və əhəmiyyəti barədə önəmli açıqlamalar verdi. Hər iki seçkinin müstəqil ölkəmizin tarixində ilk dəfə olaraq bütün ərazilərimizdə keçirilməsi mühüm tarixi hadisə idi. İkinci Qarabağ müharibəsində əldə etdiyimiz Zəfər və ötən il suverenliyimizin tam bərpa edilməsi, həqiqətən də, dünya tarixinə qızıl hərflərlə yazıldı. Dövlətimizin başçısı ölkənin qarşısında duran əsas vəzifələri diqqətə çatdırdı, prioritet istiqamətləri sadaladı. Prezident İlham Əliyevin nitqi Azərbaycanın gələcək inkişafının yol xəritəsini müəyyən edən proqram xarakterli bir nitq oldu.
Bu sözləri AZƏRTAC-a açıqlamasında Milli Məclisin deputatı Tahir Mirkişili söyləyib.
O bildirib ki, Azərbaycan xalqının güclü iradə, birlik ortaya qoyaraq 30 il davam edən işğalı aradan qaldırması ölkəmizin sosial-iqtisadi həyatına da müsbət təsir göstərməkdədir: “Müharibədən sonra Qarabağın və Şərqi Zəngəzurun yenidən qurulması üçün görülən işlər müqayisə olunmazdır. Hazırda bu istiqamətdə işlər yüksək sürətlə davam edir. Artıq 8 mindən çox keçmiş köçkün Qarabağa və Şərqi Zəngəzura yerləşib. İşğaldan azad edilmiş ərazilərdə məktəblər, xəstəxanalar, sosial obyektlər, kəndlər salınır. Mədəni, tarixi irsimizin qorunması, bərpası üçün praktiki işlər görülür. Ermənilər tərəfindən dağıdılmış 7 məscid yenidən qurulub, 8 məscidin inşası davam edir. Ölkəmiz bütün bu işləri əsasən öz hesabına həyata keçirir. Ermənistan dövləti məqsədli şəkildə bizim tarixi və mədəni irsimizi silmək üçün vandalizmə yol verib. Buna görə də Ermənistanın Azərbaycana təzminat ödəməsi vacibdir. Artıq bununla bağlı hüquqi müstəvidə işlərə start verilib. Düşünürəm ki, təzminatın ödənilməsi sülh şərtlərindən biri olmalıdır. Dövlətimizin başçısı çıxışında, həmçinin 8 ayda iqtisadiyyatımızda 4 faizdən çox artımın olduğunu, qeyri-neft sektorunda isə 7 faiz yüksəlişin qeydə alındığını vurğulayıb. Son beş ildə minimum əməkhaqqı 2,7 dəfə, minimum pensiyanın 2,5 dəfə artdığını bildirən Prezident gələn ildən minimum əməkhaqqı və minimum pensiyanın yenə də artırılacağını bildirib. Xatırladım ki, 2023-cü il yanvarın 1-dən Azərbaycanda minimum aylıq əməkhaqqı 300 manatdan 345 manata, minimum pensiya isə 240 manatdan 280 manata qaldırılıb. Təbii ki, növbəti artım zamanı Dövlət Statistika Komitəsinin illik elan etdiyi inflyasiya göstəriciləri nəzərə alınacaq. Noyabrın 1-nə qədər Əmək və Əhalinin Sosial Müdafiəsi Nazirliyi tərəfindən minimum əməkhaqqı və eləcə də minimum pensiyaların artırılması ilə bağlı təkliflər təqdim olunacaq. Pensiyaların indeksləşdirilməsində inflyasiya faktoru mühüm rol oynayır. Minimum aylıq əməkhaqqı və pensiyaların artımı əhalinin sosial təminatının yaxşılaşmasına ciddi təsir göstərəcək. Sosial müdafiə sistemində şəffaflığın təmin olunması üçün son illər böyük işlər görülüb”.
T.Mirkişili deyib: “Dövlətimizin başçısı çıxışında sülh danışıqlarının Azərbaycanın təşəbbüsü ilə başladığını və əsas prinsiplərin məhz bizim tərəfimizdən bəyan edildiyini diqqətə çatdırdı. Ermənistanın süni şəkildə prosesi uzatması və silahlanma siyasəti onların sülh prosesində səmimi olmadığını göstərir. Bəzi Qərb dövlətlərinin və beynəlxalq təşkilatların müxtəlif adlar altında Ermənistana göstərdikləri dəstək əslində sülh prosesini pozmağa hesablanıb. Bütün bunlar Azərbaycanı məcbur edir ki, özünün hərbi potensialını, silah istehsalını daha da gücləndirsin. İkinci Qarabağ müharibəsindən sonra Azərbaycan öz hərbi gücünü artırmaq üçün yeni silahlı birləşmələr yaratdı, xüsusi təyinatlı qüvvələrin say tərkibini bir neçə dəfə artırdı. Ölkəmizdə hərbi sənaye kompleksinin gücləndirilməsi üçün vacib addımlar atılır. Yuxarıda qeyd olunanlar ölkəmizdə həyata keçirilən sosial siyasətin davamlılığından xəbər verir. Bütün bunlar iqtisadiyyatın şaxələndirilməsi, qeyri-neft sektorunun inkişafı, yerli istehsalın genişlənməsi hesabına əldə olunub”.
Deputat qeyd edib ki, 30 il əvvəl Ulu Öndər Heydər Əliyevin rəhbərliyi ilə “Əsrin müqaviləsi”nin imzalanması Azərbaycan üçün əsrin qələbəsi ilə nəticələndi. Sentyabrın 20-sinin Azərbaycanın Suverenliyi Günü elan edilməsi böyük tarixi əhəmiyyət kəsb edir. Prezident İlham Əliyevin liderliyi ilə Azərbaycan yeni strateji inkişaf xəritəsini müəyyənləşdirib və bu istiqamətdə, həmçinin enerji dəhlizləri sahəsində ciddi uğurlara imza atıb. Avropanın enerji arxitekturasının etibarlı şəkildə təmin olunmasında öz töhfəmizi vermişik. Azərbaycan Qərblə Şərq arasındakı Orta Dəhlizin imkanlarını daha da genişləndirir, Şimalla Cənub arasında nəqliyyat dəhlizinin qurulmasında fəal iştirak edir. Avrasiya coğrafiyasının yeni logistik marşrutunun müəyyənləşdirilməsində Azərbaycan önəmli rol oynayır. Yaşıl enerji sahəsində artıq uğurlara imza atmaqdayıq. Azərbaycan təkcə özünün yaşıl enerji potensialını artırmır, həm də Cənubi Qafqaz bölgəsinin, Mərkəzi Asiya və digər bölgələrin imkanlarından faydalanmaqla Orta Dəhlizi yaşıl enerji dəhlizinə çevirməyi hədəfləyib. Həyata keçirilən məqsədyönlü siyasətin nəticəsidir ki, ölkəmizin beynəlxalq aləmdəki nüfuzu gündən-günə güclənir, bizimlə dostluq etmək istəyən dövlətlərin sayı artır.
COP29 kimi mötəbər tədbirin Azərbaycanda keçirilməsinin ölkəmizin artan nüfuzunun bariz nümunəsi olduğunu deyən T.Mirkişili əlavə edib: “Məhz 200-ə yaxın ölkə tərəfindən qəbul edilmiş bu tarixi qərar Azərbaycana olan inam və etibardan qaynaqlanır. Dünyada dayanıqlı sülhün, təhlükəsizliyin təmin olunması üçün sıx əməkdaşlıq formatlarının qurulması Azərbaycanın hədəflərindən biridir. Prezident İlham Əliyevin liderliyi ilə Azərbaycan bu istiqamətdə ciddi uğurlara imza atacaq”.
Bölmənin digər xəbərləri
