Minlərlə indoneziyalı Xocalı soyqırımı barədə məlumatlandırılıb
Cakarta, 26 fevral, AZƏRTAC
Xocalı soyqırımı qurbanlarının xatirəsi İndoneziyada da geniş tədbirlərlə anılıb.
Azərbaycanın İndoneziyadakı səfirliyindən AZƏRTAC-ın bu ölkədəki bürosuna verilən məlumatda qeyd edilir ki, İndoneziyada 2018-ci il fevralın 25-də “#justiceforkhojaly” həştaqı günün ilk yarısında ölkə üzrə bütün sosial şəbəkələrdə, xüsusilə də “twitter”də ən çox yayılan həştaq olaraq qeydə alınıb.
Cənub-Şərqi Asiyanın ən böyük məscidi olan İstiqlal məscidində Ustad Yusuf Mansurun aylıq seminarında Xocalı soyqırımının ildönümünə xüsusi yer verilib və minlərlə dinləyici bu haqda məlumatlandırılıb.
Məşhur İslam alimi Ustad Yusuf Mansurun aylıq seminarını dinləmək üçün ölkənin hər tərəfindən gəlmiş minlərlə insan əvvəlcə Xocalı soyqırımının anımı ilə bağlı nümayiş etdirilən videosüjeti izləyib. Buradakı plakatı, “Xocalıya ədalət!” kampaniyası üçün xüsusi hazırlanmış köynəklər və papaqların paylanılmasını, həmçinin Ustad Yusuf Mansurun Xocalı qurbanlarına həsr olunan dualarını sosial şəbəkələrdəki hesablarında paylaşıblar. Seminarı bir neçə yerli televiziya kanalı canlı yayımlayıb.
Ustad Y.Mansur bildirib ki, 26 fevral Xocalı soyqırımının anım günüdür və bu cinayət Ermənistanın Azərbaycana qarşı təcavüzü nəticəsində baş verib.
Sonra məscidin müxtəlif yerlərində quraşdırılmış monitorlarda “Sonsuz dəhliz” sənədli filmindən fraqmentlər nümayiş olunub, Ermənistanın Azərbaycana qarşı təcavüzü haqqında məlumat verilib. Xocalı soyqırımının 366-cı motoatıcı alayın köməyi ilə erməni silahlı dəstələri tərəfindən törədildiyi bildirilib. BMT Təhlükəsizlik Şurasının müvafiq qətnamələri, Xocalı soyqırımına dünya ölkələrinin, xüsusilə də İƏT-ə üzv ölkələrin münasibəti sadalanıb. Xocalı soyqırımını törədənlərin bu gün Ermənistanın prezidenti də daxil olmaqla, bu ölkənin müxtəlif hakim dairələrində hələ də mühakiməsiz fəaliyyət göstərdikləri vurğulanıb və insanlığa qarşı cinayət törətmiş bu şəxslər haqqında beynəlxalq hərbi tribunalın təşkil edilməsinin vacibliyi bildirilib.
Seminarda Xocalı soyqırımının 26-cı ildönümünün anılması barədə reportaj yerli KİV-lərdə geniş işıqlandırılıb.
Vüqar Ağayev
AZƏRTAC-ın xüsusi müxbiri
Cakarta
Bölmənin digər xəbərləri
