Misir ictimaiyyəti Azərbaycan reallıqları haqqında məlumatlandırılıb
Azərbaycanın Misirdəki səfiri Şahin Abdullayev “OnTv” peyk televiziya kanalına müsahibəsində ölkəmizlə bağlı reallıqlar haqqında danışıb.
Səfir müsəlman Şərqinin ilk demokratik respublikası olan Azərbaycan Xalq Cümhuriyyətinin varisi kimi Azərbaycanın 1991-ci il oktyabrın 18-də müstəqilliyini bərpa etdiyini bildirib. O, Azərbaycanın beynəlxalq aləmə inteqrasiya edərək bir çox beynəlxalq və regional təşkilatlara üzv olduğunu, eyni zamanda, ölkəmizin tarixən tərkib hissəsi olduğu və birgə irsi bölüşdüyü İslam dünyası ilə də əlaqələrini bərpa etdiyini və əməkdaşlıq münasibətləri qurduğunu qeyd edib.
Ş.Abdullayev Azərbaycanın xarici siyasətinin beynəlxalq hüququn norma və prinsiplərinə söykəndiyini vurğulayıb, ölkənin öz milli maraqlarına uyğun olaraq qarşılıqlı hörmət, dövlətlərin suverenliyi və ərazi bütövlüyü, başqa ölkələrin daxili işlərinə qarışmamaq kimi prinsiplər əsasında dünya dövlətləri ilə əməkdaşlıq etdiyini söyləyib.
Səfir Ermənistanın Azərbaycana qarşı işğalçılıq siyasəti barədə də məlumat verib, sözügedən münaqişə ilə bağlı BMT Təhlükəsizlik Şurasının qəbul etdiyi dörd qətnamənin rəsmi Yerevan tərəfindən indiyədək yerinə yetirilmədiyini bildirib.
Diplomat son illər ərzində Misirdə baş verən dəyişikliklərə münasibət bildirərək, ölkədəki mövcud vəziyyəti Azərbaycanın ötən əsrin 90-cı illərində yaşadığı vəziyyətlə müqayisə edib. O, həmin dövrlərdə Azərbaycanda vəziyyətin çox çətin olduğunu söyləyib. Səfir 1993-cü ildə xalqın təkidli tələbi ilə hakimiyyətə qayıdan ulu öndər Heydər Əliyevin Azərbaycanı üzləşdiyi böhrandan çıxarmaq üçün göstərdiyi xidmətlərdən ətraflı bəhs edib. O əlavə edib ki, yalnız bundan sonra Ermənistan tərəfi ilə atəşkəslə bağlı razılaşma əldə edildi, Ümummilli Lider tərəfindən milli enerji strategiyası işlənilib hazırlandı və onun rəhbərliyi ilə 1994-cü ildə dünyanın müxtəlif şirkətlərinin iştirak etdiyi “Əsrin müqaviləsi” imzalandı.
Bu gün Azərbaycanın ən sürətlə inkişaf edən dövlətlərdən biri olduğunu qeyd edən Ş.Abdullayev ölkənin Avropanın enerji təhlükəsizliyində aparıcı rol oynadığını bildirib, gənclər siyasəti və idmanın inkişafı istiqamətində hökumətin həyata keçirdiyi ardıcıl tədbirlər barədə məlumat verib. Səfir neft-qaz sektoru ilə bərabər, ölkə rəhbərliyi tərəfindən qeyri-neft sektoru və sənaye sahəsinin inkişafında görülən məqsədyönlü tədbirlərdən də danışıb.
Azərbaycan-Misir əlaqələrinə toxunan Ş.Abdullayev iki ölkə arasında ortaq dəyərlərin mövcud olduğunu, Azərbaycanın İslam dünyasının ayrılmaz bir hissəsi olduğunu, ölkənin xarici siyasətinin əsas istiqamətlərindən birinin də ərəb və İslam dünyası, xüsusilə də Misir Ərəb Respublikası ilə əməkdaşlıq etmək olduğunu bildirib.
İki ölkə arasında əlaqələrin yaxşı səviyyədə olduğunu vurğulayan səfir Misir və Azərbaycan arasında son illərdə iqtisadi sahədə əməkdaşlığın inkişaf etdiyini vurğulayıb.
Ş.Abdullayev oktyabrın 24-də Misirin Şimali Sinay yarımadasında ordu qüvvələrinə qarşı törədilmiş terror aktına da toxunub, Azərbaycanın erməni terrorundan zərər çəkən ölkə olduğunu qeyd edib. O, Azərbaycanın terrorun bütün forma və təzahürlərini qəti şəkildə pislədiyini vurğulayıb.
Müsahibə zamanı Azərbaycanın tarixini, mədəniyyətini və müasirliyini əks etdirən görüntülər yayımlanıb.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
