Mobil cihazlardan istifadə məktəblilərin müvəffəqiyyət dərəcəsini aşağı salır
Stokholm, 29 may, Nərgiz Cəfərli, AZƏRTAC
Məktəblilərin mobil telefonlardan istifadə etməsi onların təhsilinə mənfi təsir göstərir.
AZƏRTAC xəbər verir ki, bunu İqtisadi Əməkdaşlıq və İnkişaf Təşkilatının (İƏİT) yeni “Tələbələr, rəqəmsal cihazlar və müvəffəqiyyət” hesabatı sübut edir.
Dünyanın təxminən səksən ölkəsində dörd ildən bir keçirilən Pisa-2022 Beynəlxalq Şagirdlərin Qiymətləndirmə Proqramının (Programme for International Student Assessment) son nəticələrinə görə, bütün dünyada 15 yaşlı şagirdlərin bilik səviyyəsi yeni minimuma qədər enib. Bunun əsas səbəbi pandemiya və bir çox ölkədə COVID-19-un yayılmasının yavaşlaması məqsədilə məktəblərin bağlanması olub.
Yeni məlumatlar isə bilik səviyyəsinin aşağı düşməsinin daha bir mühüm səbəbi kimi gənclər tərəfindən mobil telefonlar və sosial şəbəkələrdən istifadəyə işarə edir.
“Biz yeni kəşflər etdik və müvəffəqiyyət dərəcəsinin enməsinin pandemiya dövründə məktəblərin bağlanmasından daha çox mobil cihazların istifadəsindən asılı olduğunu görəndə çox təəccübləndik”, - deyə İƏİT-nin təhsil şöbəsinin müdiri və Pisa kuratoru Andreas Şleyxer bildirib.
Hesabata əsasən, məktəblilər mobil telefonlardan və sosial şəbəkələrdən dərslər, ev tapşırıqlarının yerinə yetirilməsi ilə paralel olaraq istifadə edirlər.
Şagirdlər özləri daima mobil cihazlardan istifadə etməkdən asılı olduğunu və bunun nəticəsində onların bir sıra mənfi nəticələrə məruz qaldığını deyirlər.
Bölmənin digər xəbərləri
