MOSKVA BOKS ÜZRƏ DÜNYA KUBOKUNU QƏBUL ETMƏK HÜQUQUNA NAİL OLMUŞDUR
AZƏRTAC xəbər verir ki, boks üzrə Dünya kuboku oyunları Moskvada keçiriləcəkdir. Belə bir qərar Cənubi Koreyanın Pusan şəhərində Beynəlxalq Həvəskar Boks Assosiasiyası (AİBA) İcraiyyə Komitəsinin iclasında qəbul olunmuşdur.
Beləliklə, Rusiya Boks Federasiyası yeganə rəqibi olan Cənubi Koreya Boks Federasiyasına üstün gəlmişdir. İlk əvvəl rusiyalılar Moskva və Sankt-Peterburq arasında seçim edirdilər, lakin nəticədə paytaxtın namizədliyi üzərində dayanmaq qərarına gəlmişlər.
Turnir dekabrda keçiriləcək, yarışların dəqiq vaxtı sonralar bilinəcəkdir.
Dünya Kuboku - 2008 yeni sistem üzrə keçiriləcək. Əgər əvvəllər yarışlarda yığmalar iştirak edirdilərsə, indi Dünya kuboku uğrunda hər çəki dərəcəsində səkkiz ən güclü boksçu rinqə çıxacaqdır.
Pusanda AİBA kontinental konfederasiyalar prezidentlərinin seçkiləri də olmuşdur. İndi konfederasiyalarda əvvəllər mövcud olmuş AİBA Bürosu və kontinental assosiasiyalar birləşmişdir. Fransız Yumber Furqoni AİBA Avropa Konfederasiyasının prezidenti seçilmişdir.
Bölmənin digər xəbərləri
