“MOSKVA” UNİVERMAĞINDAN OĞURLUQ ETMƏYƏ HAZIRLAŞAN CİNAYƏTKAR QRUPUN ÜZVLƏRİ TUTULMUŞLAR
Daxili İşlər Nazirliyinin mətbuat xidmətindən AZƏRTAC-a bildirmişlər ki,Çevik Polis Alayı və Nəsimi Rayon Polis İdarəsinin 19-cu bölməsi əməkdaşlarının birgə keçirdikləri əməliyyat tədbirləri nəticəsində sentyabrın 24-də saat 3.30 radələrində A.Məhərrəmov küçəsində “VAZ-2107” markalı avtomaşının sürücüsü, Yeni Suraxanı qəsəbəsinin sakini Baba Aydəmirov və sərnişini, Masallı rayon sakini Ruslan Abbasov şübhəli şəxs qismində saxlanılmışlar. Avtomaşına baxış zamanı 2 ədəd dəmirkəsən qayçı, əlcək, idman papağı və sair əşyalar aşkar edilmişdir. Araşdırmalar zamanı B.Aydəmirov və R.Abbasov “Moskva” univermağından oğurluq etməyə hazırlaşdıqlarını etiraf etmişlər.
Cinayət-Axtarış Baş İdarəsi, Bakı Şəhər Baş Polis İdarəsinin Cinayət-Axtarış İdarəsi və Nəsimi Rayon Polis İdarəsinin Cinayət-Axtarış Şöbəsi əməkdaşlarının birgə keçirdikləri əməliyyat-axtarış tədbirləri nəticəsində qrupun digər üzvləri - Əmircan qəsəbəsinin sakinləri Eldar Əlisultanov, Pərviz Zöhrabov və Valeh Əsədullayev tutulmuşlar.
Faktla bağlı araşdırmalar davam etdirilir.
Bölmənin digər xəbərləri
