Moskvalı uşaqlar günəşi qaytarmaq üçün Bakıya – nağıllar aləminə səyahət ediblər VİDEO
Moskva, 20 noyabr, AZƏRTAC
Moskva İctimai Təşkilatlar Evində Moskvada yerləşən "Dostluq-Drujba" təşkilatı tərəfindən təşkil edilən mədəni-maarif tədbiri keçirilib.
AZƏRTAC xəbər verir ki, gənc ifaçılar və onların valideynləri “Günəş, biz uçuruq!” adlı interaktiv tamaşanın premyerasına toplaşıblar. Proqram başlamazdan əvvəl Azərbaycanın Rusiyadakı səfirliyinin müşaviri Yusif Vəzirov çıxış edərək uşaqlar arasında əlaqələrin möhkəmləndirilməsi və milli adət-ənənələrin qorunması üçün bu cür mədəni layihələrin əhəmiyyətini qeyd edib.
Tamaşa proqramın mərkəzi tədbirinə çevrilib və uşaqları səhnədə canlı musiqili təqdimat hazırlamaq üçün bir araya gətirib. Bu maraqlı tamaşa bəşəriyyət tərəfindən incidilmiş Günəşin Bakıya tətilə getməsindən bəhs edir. Rus və Azərbaycan xalq nağıllarından götürülmüş personajlar onun itirilmiş şüalarını toplamaq üçün Moskvadan Bakıya sehrli xalça səyahətinə çıxırlar. Hər bir şüa mühüm insani keyfiyyəti - dostluğu, hörməti, təbəssümü, yaradıcılığı, qonaqpərvərliyi, cəsarəti və xeyirxahlığı simvolizə edir. Hər bölümdə uşaqlar tamaşaçılarla qarşılıqlı təmasda olur, canlı, səmimi iştirak ab-havası yaradır və tamaşaçılara özlərini nağıllara səyahətin bir hissəsi kimi hiss etməyə imkan verirlər.
Tamaşa beynəlxalq mükafatlar laureatı, müəllif Emiliya Dementsova və quruluşçu-rejissor Tərlan Rəsulov, pedaqoq Rəna İsmayılova, tərbiyəçi-müəllim Vüsalə Cəfərova, quruluşçu-xoreoqraf Rəna Qafarlı, səhnə tərtibatçısı Sevinc Soltanova, təşkilatçı və əlaqələndirici Ulduz Əsgərova tərəfindən hazırlanıb.
Emiliya Dementsova AZƏRTAC-a müsahibəsində qeyd edib ki, uşaq teatrı sadə sözlərin sehrə çevrildiyi bir məkandır. O əlavə edib: “Uşaq tamaşası məkanı mürəkkəb məsələlər haqqında sadə dillə danışa biləcəyiniz nadir bir yerdir. Əgər tamaşaçılar buradan təbəssüm və isti ab-hava ilə ayrılırlarsa, deməli, Günəş həqiqətən qayıdıb”.
Tamaşadan sonra qonaqlar konsertdən zövq alıblar. Məhəmməd Şükürovun rəhbərlik etdiyi “Qarabağ” rəqs ansamblı Azərbaycan xalq rəqslərini ifa edib. Rəngarəng geyimlər, rəqs hərəkətləri və milli kolorit tamaşaçılarda hərarətli reaksiya doğurub. Tədbir Almaz Zairovanın rəhbərlik etdiyi uşaq xorunun (konsertmeysterlər Leyla Süleymanova və Şəms Teymurova) çıxışı ilə başa çatıb. Xor dostluğa, sülhə və mehribanlığa həsr olunmuş mahnılar ifa edib. Tamaşaçılar gənc müğənnilərin səmimiyyətini, emosionallığını və yüksəksəviyyəli ifasını gurultulu alqışlarla qarşılayıblar.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
