“MÜNAQİŞƏ VƏ SÜLH QURUCULUĞU: PROBLEMƏ GİRİŞ” KURSUNUN TƏQDİMAT MƏRASİMİ KEÇİRİLMİŞDİR
Birləşmiş Millətlər Təşkilatı Qadınlar üçün İnkişaf Fondunun (YUNİFEM) “Qadınlar Cənubi Qafqazda münaqişələrin qarşısının alınması və sülh yaradılması uğrunda” layihəsinin Azərbaycandakı nümayəndəliyi və Təhsil Nazirliyinin təşəbbüsü ilə Bakı Dövlət Universitetində “Münaqişə və sülh quruculuğu: problemə giriş” kursunun təqdimat mərasimi keçirilmişdir.
Qadınlar üçün İnkişaf Fondundan AZƏRTAC-a bildirmişlər ki, BDU-nun rektoru Abel Məhərrəmov tədbirin əhəmiyyətindən danışmışdır. Qeyd etmişdir ki, münaqişələrin qaşısının alınmasını və sülh yaradılmasını təbliğ edən belə tədbirlərin tədris ocaqlarında keçirilməsi çox əhəmiyyətli bir işdir. Bu proqram əsasında müntəxabatın hazırlanması və ali məktəblərdə tədris olunması təqdirəlayiq haldır.
Toplantıda təhsil nazirinin müavini İskəndər İskəndərov, BMT-nin rezident əlaqələndiricisinin müavini Deyvid Eyzenberq, Qadınlar üçün İnkişaf Fondunun Azərbaycan üzrə əlaqələndiricisi Gülşən Paşayeva, dosent Hicran Hüseynova məruzə etmişlər. Onlar “Münaqişə və sülh quruculuğu: problemə giriş” kursunun tədrisindən, “Qadınlar Cənubi Qafqazda münaqişələrin qarşısının alınması və sülh yaradılması uğrunda” layihəsinin yaranmasından, fəaliyyət göstərdiyi iki il müddətində əldə etdiyi uğurlardan danışmış, belə layihələrin həyata keçirilməsinin əhəmiyyətini xususi vurğulamışlar.
Sonda məruzələr ətrafında müzakirələr olmuşdur.
Bölmənin digər xəbərləri
