MÜTƏXƏSSİSLƏR ŞƏKİDƏ VƏTƏNDAŞLARA DƏYMİŞ ZİYANIN MİQDARINI DƏQİQLƏŞDİRİRLƏR
AZƏRTAC xəbər verir ki, iyulun 29-da baş vermiş təbii fəlakətin - güclü leysanın nəticələrinin aradan qaldırılması ilə əlaqədar həyata keçirilən tədbirlərlə yerindəcə tanış olmaq, habelə leysan nəticəsində vətəndaşlara dəymiş zərərin miqdarını dəqiqləşdirmək məqsədilə respublika fövqəladə hallar nazirinin müavini Orucəli Hacıyevin rəhbərliyi ilə mütəxəssislər qrupu sentyabrın 6-8-də Şəkidə olmuşdur. Fövqəladə Hallar, Maliyyə, Kənd Təsərrüfatı və Nəqliyyat nazirliklərinin, habelə Meliorasiya və Su Təsərrüfatı ASC-nin nümayəndələrindən ibarət qrupun üzvləri yerli mütəxəssislərlə birlikdə şəhərin baş su hövzəsində, habelə leysan nəticəsində daha çox zərər görmüş Qoxmuq, Köndələn, Oraban, Aşağı Göynük, Baş Göynük və digər kəndlərdə vətəndaşlara dəymiş ziyanın miqdarını tam dəqiqləşdirmək məqsədi ilə araşdırmalar, müşahidələr aparmış, sakinlərin qayğı və problemləri ilə maraqlanmışlar. Mütəxəssislər təbii fəlakətin nəticələrinin aradan qaldırılması ilə bağlı şəhər rəhbərliyinin və rayon fövqəladə hallar komissiyasının həyata keçirdiyi operativ tədbirlərin qənaətbəxş olduğunu bildirmişlər. Xatırladaq ki, yerli mütəxəssislərin ilkin hesablamalarına görə, təbii fəlakət nəticəsində Şəki şəhərinə və kəndlərə ümumilikdə 4 milyon manata (AZN) yaxın ziyan dəymişdir.
Bölmənin digər xəbərləri
