Muxtar respublikada istehsal edilən məhsulların keyfiyyətinə nəzarət tədbirləri uğurla davam etdirilir
Naxçıvan, 12 yanvar, AZƏRTAC
Naxçıvan Muxtar Respublikası Antiinhisar və İstehlak Bazarına Nəzarət Dövlət Xidməti tərəfindən 2020-ci il ərzində məhsul nümunələrinin 1862 halda, o cümlədən qida məhsullarının 1764 halda keyfiyyət və təhlükəsizlik göstəricilərinin yoxlanılması təmin olunub və bu istiqamətdə ciddi nöqsanlar aşkar edilməyib.
AZƏRTAC-ın Naxçıvan bürosu xəbər verir ki, bu faktlar Naxçıvan Muxtar Respublikası Antiinhisar və İstehlak Bazarına Nəzarət Dövlət Xidmətində 2020-ci ilin yekunları və Naxçıvan Muxtar Respublikası Ali Məclisinin altıncı çağırış dördüncü sessiyasında qarşıya qoyulan vəzifələr barəsində keçirilən kollegiya iclasında səsləndirilib.
İclasda çıxış edən Xidmətin rəisi Bəxtiyar İsmayılov bildirib ki, muxtar respublikada həyata keçirilən sosial-iqtisadi inkişaf siyasətinin mühüm tərkib hissəsi kimi əhalinin sağlamlığının və alıcılıq qabiliyyətinin qorunub saxlanılmasına, keyfiyyətli yerli məhsulların istehsalının təşviqinə xidmət edən müxtəlif nəzarət tədbirlərini həyata keçirməklə bağlı Xidmətin də qarşısına mühüm vəzifələr qoyulub.
Qeyd olunub ki, bu istiqamətdə həyata keçirilən tədbirlər 2020-ci il ərzində də davam etdirilib və hesabat dövrü ərzində Xidmət tərəfindən 237 qida istehsalı müəssisəsinə maarifləndirmə xarakterli baxış keçirilib. Meyvə-tərəvəz və onlardan hazırlanmış məhsulların keyfiyyətinin nəzarətdə saxlanılması məqsədilə 2020-ci il ərzində məhsulların 525 halda texniki normativ-hüquqi aktların, standartların və texniki şərtlərin tələblərinə uyğunluğu yoxlanılıb, nöqsan aşkar edilməyib və müvafiq məhsulların 13 halda sertifikatlaşdırılması həyata keçirilib. Ötən il noyabr ayında təşkil olunmuş “Ailə təsərrüfatı məhsulları” yarmarkasında 447 ailə təsərrüfatının iştirak etməsi, 1601 çeşiddə məhsul çıxarılması bu sahədə əldə olunan uğurlardan xəbər verir.
Bildirilib ki, 2020-ci il ərzində alkoqollu içkilər istehsal edən 4 müəssisədə istehsal olunan laboratoriya analizləri aparılaraq keyfiyyət və təhlükəsizlik göstəricilərinin texniki normativ-hüquqi aktların, standartların tələblərinə uyğunluğu müəyyən edilib. Xidmət tərəfindən hesabat ili ərzində 144 ət satışı mağazasına, 231 ictimai iaşə və xidmət sahəsinə, 47 topdansatış obyektinə, 653 ərzaq və qeyri-ərzaq mağazasına, 36 təhsil müəssisəsinin bufet və ya yeməkxanasına 314 bərbərxana və 210 gözəllik salonuna maarifləndirmə xarakterli baxış keçirilib, aşkar olunmuş çatışmazlıqların aradan qaldırılması təmin edilib.
Diqqətə çatdırılıb ki, xarici bazarlara çıxış imkanlarının artırılması məqsədilə istehlak bazarının tələblərinə uyğun rəqabətqabiliyyətli məhsul istehsalının təmin edilməsi, ailə təsərrüfatları məhsullarının ixracına dəstək göstərilməsi üzrə verilmiş tapşırıqların icrası istiqamətində təsərrüfat subyektlərində bir sıra işlər görülüb. Həmçinin Bakı və Gəncə şəhərlərində fəaliyyət göstərən “Naxçıvan məhsulları” mağazalar şəbəkəsinə tələbata uyğun olaraq davamlı qaydada məhsulların göndərilməsi təmin edilib.
Vurğulanıb ki, hesabat ili ərzində ümumilikdə 8101 elektrik və qaz cihazına baxış keçirilib və müvafiq təhlükəsizlik sistemi ilə təmin olunmayan 167 cihazın idxalına və satışına icazə verilməyib. 2020-ci il ərzində ümumilikdə texniki normativ-hüquqi aktların, standartların və texniki şərtlərin tələblərinə uyğun olmayan 5057,3 manat dəyərində keyfiyyətsiz və ya kontrafakt məhsullar satışdan çıxarılıb.
Sonra çıxışlar olub.
Bölmənin digər xəbərləri
