NARKOMANLIĞA VƏ NARKOTİK VASİTƏLƏRİN QANUNSUZ DÖVRİYYƏSİNƏ QARŞI MÜBARİZƏ DAVAM EDİR
Həmin dövrdə ayrı-ayrı şəxslərdən 118 kiloqram 414 qram narkotik vasitələr, psixotrop maddələr və prekursorlar, o cümlədən 5 kiloqram 663 qram heroin, 26 kiloqram 141 qram tiryək, 3 kiloqramdan çox həşiş, 83 kiloqram 596 qram marixuana, 363 ampula, 2622 həb güclü təsiredicilər, 13,38 qram sirkə anhidridi götürülmüşdür. Yabanı halda bitmiş və qanunsuz əkilib becərilmiş 74 ton 173 kiloqram narkotik xassəli bitkilər aşkar olunaraq məhv edilmişdir.
Hüquq mühafizə orqanları ölkə ərazisində “Xaşxaş-2004” şərti adı altında keçirilən kompleks əməliyyat-axtarış və profilaktika tədbirləri çərçivəsində əsas diqqəti yenə də narkotik vasitələrin qanunsuz dövriyyəsinə qarşı mübarizəyə, onların daxilolma mənbələrinin aşkar edilməsinə yönəltmişlər ki, bu da öz müsbət nəticəsini verir.
Cari ilin altı ayında bu növ cinayətlər törətdiklərinə görə 45 nəfər xarici vətəndaş məsuliyyətə cəlb olunmuş, onlardan 20 kiloqramdan artıq müxtəlif növ narkotik vasitələr götürülmüşdür. Həmin şəxslərdən 31 nəfəri İran, 10-u Gürcüstan, 2-si Rusiya, 1-i Ukrayna və 1 nəfəri isə İsrail vətəndaşıdır.
