Nasir Əbdül Kərim: Bakı Şopinq Festivalı iqtisadiyyata təkan verəcək
Bakı, 4 noyabr, AZƏRTAC
Fələstinin ölkəmizdəki səfiri Nasir Əbdül Kərim Azərbaycan hökumətinin ölkədə şopinq festivalı keçirmək təşəbbüsünü yüksək qiymətləndirir.
AZƏRTAC xəbər verir ki, festivalın saytına açıqlama verən diplomat deyib: “Bu tipli festivallar ölkədə turizmin inkişafına təsirsiz qalmayacaq. Bakıda şopinq festivalının keçirilməsi çox yaxşıdır. Bu, ölkəyə turist cəlb etmək üçün möhtəşəm tədbirdir. Azərbaycan çox gözəl və füsunkar ölkədir. Şopinq festivalı isə turistləri həm Azərbaycanın gözəlliyini görməyə, həm də buraya gəlib alış-veriş etməyə sövq edəcək”.
Səfir bildirib ki, şopinq festivalı, eyni zamanda, iqtisadiyyatın inkişafına təkan verəcək. Sahibkarlığın rəqabətə yol açdığını deyən səfir düşünür ki, festival həm də məhsulların daha cəlbedici yolla müştərilərə təqdim edilməsinə müsbət təsir göstərə bilər: “Sahibkarlığın inkişafı iqtisadiyyatı irəli aparır. Bu kimi festivalların hər il keçirilməsi çox yaxşıdır. Düşünürəm ki, bu, həm də daxili iqtisadiyyata, yəni bir tərəfdən turizmin inkişafına töhfə verəcək, digər tərəfdən də yerli istehlakçıların daha çox alış-veriş etməsinə şərait yaradacaq. Daha çox alış-veriş isə iqtisadiyyata təkan verəcək”.
Bölmənin digər xəbərləri
