Naxçıvan, 14 yanvar, AZƏRTAC

Cari tədris ilində “Naxçıvan” Universitetində 4 fakültə, 10 kafedra, 7 şöbə, 4 mərkəz fəaliyyət göstərib. Hazırda “Naxçıvan” Universitetində bütün səviyyələr üzrə 1339 tələbə təhsil alır. Onlardan 18 ixtisas üzrə 1277 nəfəri bakalavr, 8 ixtisas üzrə 21 nəfəri magistr, 11 ixtisas üzrə 29 nəfəri doktorant və dissertant, 6 ixtisas üzrə 12 tələbə isə akademik möhlətlidir.

“Naxçıvan” Universitetindən AZƏRTAC-ın Naxçıvan bürosuna bildirilib ki, bu faktlar universitetdə 2020-ci ilin yekunları və qarşıda duran vəzifələrə həsr olunan yığıncaqda səsləndirilib.

İclasda çıxış edən ali təhsil ocağının rektoru, filologiya üzrə fəlsəfə doktoru, dosent Nurlana Əliyeva altıncı çağırış Naxçıvan Muxtar Respublikası Ali Məclisinin dördüncü sessiyasından irəli gələn vəzifələr və 2020-ci ildə görülmüş işlərlə bağlı çıxış edərək bildirib ki, dövlətimizin hərtərəfli diqqət və qayğısı ilə maddi-texniki bazanın müasirləşdirilərək daha da möhkəmləndirilməsi, tədris prosesinin günün tələbləri səviyyəsində qurulması istiqamətində tədbirlər bu il də davam etdirilib.

Diqqətə çatdırılıb ki, universitetin fakültələrinin hər birində tədris və təlimin keyfiyyətinin yüksəkdilməsinə, əyaniliyin möhkəmlənməsinə müsbət təsir göstərən texnologiyalardan istifadəyə geniş şərait yaradılıb. Hesabat ilində universitet əməkdaşlarının 1 monoqrafiyası, 2 kitabı, 5 dərs vəsaiti, 14 proqramı, 198 elmi məqaləsi, 9 tezisi 52 konfrans material nəşr olunub. 2020-ci ilin birinci yarımilində dünyada baş vermiş məlum pandemiya ilə əlaqədar olaraq “Naxçıvan” Universitetində də dərslər dayandırılıb, bütün ixtisaslar üzrə mühazirə mətnlərinin elektron bazaya yerləşdirilməsi yolu ilə tədris bərpa olunub, “Zoom” proqramı vasitəsilə tələbələrə onlayn dərslər keçirilib.

Vurğulanıb ki, onlayn tədrisə keçid yalnız tədris sahəsini əhatə etməyib. Belə ki, universitet bu müddət ərzində 29 elmi-praktik konfrans, 2 vebinar təlim, 4 tələbə diskussiyası onlayn formada təşkil olunub. Tədris ilində “Naxçıvan” Universiteti beynəlxalq əlaqələrin inkişaf etdirilməsi üçün bir sıra fəaliyyətlər həyata keçirib. Dünyanın 52 universiteti ilə tədris və elmi sahədə əlaqə saxlayan ali təhsil ocağı cari ildə iki beynəlxalq universitetlər birliyinin (“EURAS”, “KUNİB”) üzvü seçilib. Ali təhsil ocağı “Erasmus+” proqramı tərəfindən maliyyələşdirilən “ECAR” (Azərbaycan Rektorlar Konfransının yaradılması) layihəsinə tərəfdaş seçilərək Naxçıvan Muxtar Respublikasından bu layihəyə qoşulan ilk və yeganə universitet kimi qeydə alınıb.

Daha sonra Naxçıvan Muxtar Respublikası Ali Məclisinin deputatı, “Naxçıvan” Universitetinin Tədris və tərbiyə işləri üzrə prorektoru, dosent Hüseyn Bağırsoylunun “2020-ci ildə Naxçıvan Muxtar Respublikasının sosial-iqtisadi inkişafının yekunları”, İdarəetmə fakültəsinin dekanı Naim Cahidzadənin “Muxtar respublikada son illərdə ərzaq və enerji təhlükəsizliyinin təmin olunmasında görülən işlər və perspektivlər” mövzusunda çıxışları dinlənilib.

Qeyd olunub ki, 2020-ci ildə mövcud çətinliklərə baxmayaraq muxtar respublikanın sosial-iqtisadi inkişafı öz dinamikası ilə davam etdirilib. Naxçıvan Muxtar Respublikası Ali Məclisi sədrinin müvafiq Sərəncamı ilə 2020-ci ilin “İxrac ili” elan olunması muxtar respublikanın sosial-iqtisadi imkanlarını daha da genişləndirib, yüksəkkeyfiyyətli, beynəlxalq standartlara cavab verən məhsulların ixrac potensialının artırılmasını təmin edib.

Sonda məruzələr ətrafında çıxışlar dinlənilib.