Nazir: Heydər Əliyev Azərbaycanın müqəddəratını tənəzzüldən tərəqqiyə doğru dəyişib
Bakı, 12 dekabr, AZƏRTAC
Müasir müstəqil Azərbaycanın memarı və qurucusu, xalqımızın Ümummilli Lideri Heydər Əliyevin anım günü ilə əlaqədar Əmək və Əhalinin Sosial Müdafiəsi Nazirliyində tədbir keçirilib.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, Ulu Öndərin büstü qarşısına güllər düzülüb, xatirəsi bir dəqiqəlik sükutla yad edilib.
Əmək və əhalinin sosial müdafiəsi naziri Sahil Babayev Ümummilli Lider Heydər Əliyevin hələ 1969-1982-ci illərdə respublikamıza rəhbərlik etdiyi dövrdə dinamik inkişafa nail olunduğunu, həmin illərdə Azərbaycanın gələcək dövlət müstəqilliyi üçün vacib potensialın yaradıldığını vurğulayıb. Ulu Öndərin təşəbbüsü və böyük səyləri nəticəsində 1971-ci ildə yaradılan Cəmşid Naxçıvanski adına Hərbi Liseyin Silahlı Qüvvələrimizin formalaşmasında müstəsna rola malik olduğunu, liseyin yetirmələri olan zabitlərin tarixi Zəfərimizlə yekunlaşan 44 günlük Vətən müharibəsində də igidlik nümunəsi göstərdiklərini bildirib.
Nazir xalqın çağırışı ilə Ümummilli Lider Heydər Əliyevin 1993-cü ilin iyununda, ölkəmiz üçün çox ağır bir zamanda yenidən respublika rəhbərliyinə qayıdışının Azərbaycanın müqəddəratını tənəzzüldən tərəqqiyə doğru dəyişərək, müasir müstəqil Azərbaycan dövlətinin qurulması və uzunmüddətli inkişaf yoluna çıxmasına imkan yaratdığını qeyd edib. Həmin vaxtdan milli iqtisadiyyatın sağlam əsaslar üzərində dirçəlməsi və tərəqqisi proseslərinə, eyni zamanda, vətəndaş firavanlığının təminatı sahəsində mühüm addımların atılmasına, ildən-ilə geniş miqyas alan sosial proqramların icrasına başlanılıb.
S.Babayev Heydər Əliyevin uğurlu daxili və xarici siyasətinin Prezident İlham Əliyev tərəfindən yüksək səviyyədə davam və inkişaf etdirildiyini, bunun nəticəsi olaraq Azərbaycanın mühüm tarixi uğurlara və qələbələrə imza atdığını bildirib. Qeyd olunub ki, xüsusilə də 2020-ci ildə Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə Azərbaycan Ordusu Vətən müharibəsində qazanılan möhtəşəm Zəfər nəticəsində 30 ilə yaxın Ermənistanın işğalı altında qalmış doğma torpaqlarımız azad edildi.
Dövlətimizin başçısının sosial sahəyə xüsusi qayğısı nəticəsində ölkəmizdə ardıcıl sosial islahatlar aparılıb, sosial müdafiə və aktiv məşğulluq proqramları dəfələrlə genişlənib. Sosial ödənişlərin dəfələrlə artırılması, müasir sosial müdafiə və reabilitasiya infrastrukturunun yaradılması təmin edilib. Son illər ölkəmizdə aparılan sosial islahatların nəticələrinə beynəlxalq səviyyədə də yüksək dəyər verilir.
Bildirilib ki, 2023-cü il mayın 10-da Ümummilli Lider Heydər Əliyevin anadan olmasının 100 ili tamam olur. Prezident İlham Əliyevin imzaladığı Sərəncama əsasən, Azərbaycan xalqının Ümummilli Lideri Heydər Əliyevin 100 illik yubileyinin dövlət səviyyəsində qeyd olunmasını təmin etmək məqsədilə 2023-cü il ölkəmizdə “Heydər Əliyev İli” elan edilib. Bununla bağlı müvafiq Tədbirlər Planı əsasında gələn il ardıcıl olaraq silsilə tədbirlər həyata keçiriləcək.
Tədbir Ulu Öndərimizə həsr rolunmuş filmin nümayişi ilə davam edib.
Əmək və Əhalinin Sosial Müdafiəsi Nazirliyinin kollektivi Fəxri xiyabanda Ümummilli Lider Heydər Əliyevin məzarını ziyarət edib, hörmət və ehtiramlarını bildiriblər.
Bölmənin digər xəbərləri
