Niderlandda qış mövsümündən əvvəl qaz anbarlarını doldurmaq mümkünsüz görünür
Bakı, 26 avqust, AZƏRTAC
Niderlandın qaz şəbəkəsi operatoru “Gasunie” qış mövsümündən əvvəl ölkənin təbii qaz anbarlarını doldurmaq hədəfinə çata bilməyəcəyini açıqlayıb.
AZƏRTAC xəbər verir ki, “Gasunie” xüsusilə sərt qış şərtləri və ya potensial təchizat kəsintiləri səbəbindən bunun ölkəni hazırlıqsız qoya biləcəyi barədə xəbərdarlıq edib.
“Gasunie”nin açıqlamasına görə, 115 teravat-saat ehtiyat hədəfinə çatmaq hazırda mümkünsüzdü, çünki yay aylarında qaz anbarlarını doldurmaq kommersiya baxımından sərfəli deyil.
“Gas Infrastructure Europe”nin (GIE) məlumatında bildirilir ki, Niderlandın qaz anbarlarının doluluq nisbəti hazırda təxminən 45 faizdir.
Bu səviyyə 2009-cu ildə məlumat toplamağa başlayandan bəri qeydə alınan ən aşağı səviyyədir və beşillik orta göstərici olan 73 faizdən xeyli aşağıdır.
Ehtiyat hədəfi son 30 ilin ən sərt qış şərtləri əsasında hesablansa da, “Gasunie” narahatlıqlarını İqlim və Yaşıl İnkişaf Nazirliyinə bildirərək əlavə tədbirlər görülməsə, ölkənin ekstremal qış şərtlərinə qarşı həssas olacağını bildirib.
Bölmənin digər xəbərləri
